Konsorciumi i organizatave të shoqërisë civile i përbërë nga Grupi për Studime Politike dhe Juridike (GLPS), Instituti GAP dhe Instituti për Politika Zhvillimore (INDEP), në kuadër të projektit: “Mbështetje për Shoqërinë Civile për të Rritur Mbikëkqyrjen Publike dhe Llogaridhënien e Institucioneve Publike të Kosovës”, shpreh shqetësimin lidhur me mungesën e transparencës gjatë lëshimit të lejeve nga Ministria e Mjedisit, Planifikimit Hapësinor dhe Infrastrukturës (MMPHI) dhe ngjallë dyshime lidhur me personat e licencuar për hartimin e raporteve të Vlerësimit të Ndikimit në Mjedis (VNM).
“CorrWatch aktivisht është duke e monitoruar procedurën e lëshimit të lejeve nga Ministria e Mjedisit, Planifikimit Hapësinor dhe Infrastukturës. Gjatë monitorimit, CorrWatch ka konstatuar se gjatë tr) viteve të fundit numri i kërkesave për leje sipas regjistrit të publikuar nga institucioni në fjalë nuk është në përputhshmëri me numrin e shqyrtimeve të tyre, konkretisht: 417 kërkesa figurojnë në regjistër; 122 janë shqyrtuar dhe vetëm 27 raporte të VNM-së janë publikuar,” thuhet në kumtesën për media të CorrWatch.
Më tutje, CorrWatch ka vërejtur se disa Vendime për licencim dhe leje nuk janë në regjistër, ndërsa raportet e VNM-së të aprovuara nga MMPHI nuk përmbushin kriteret ligjore. Në disa raste, autorët e raporteve nuk figurojnë në listën e të licencuarve e cila nuk është përditësuar që nga viti 2022. Në këtë listë, të publikuar nga MMPHI, figurojnë emra të personave të cilëve u është pezulluar licenca ose janë të akuzuar për korrupsion.
Mundesh me e lexu edhe...
“Për më tepër, konkursi për licencimin e hartuesve të rinj, nuk është hapur për pothuajse katër vite, ndonëse Ministria është e detyruar ta bëjë një herë në vit. Në të njëjtën kohë, CorrWatch vazhdimisht ka kërkuar të jetë pjesë e takimeve të Komisionit për Shqyrtimin e Kërkesave për VNM, por që kërkesat nuk janë aprovuar nga Ministria, edhe pse Ligji për Vlerësimin e Ndikimit në Mjedis e lejon këtë gjë.”
Sipas njoftimit më 13 shtator 2023, në shfrytëzim të platformës zyrtare të Ministrisë së Mjedisit, Planifikimit Hapësinor dhe Infrastrukturës, CorrWatch ka kërkuar qasje në dokumente publike, konkretisht qasje në: – Regjistrin e plotë: Kërkesat për Leje Mjedisore dhe Leje Ujore; – Raportet e Vlerësimit të Ndikimit në Mjedis të papublikuara; – Listën e plotë të personave të licencuar për hartimin e Raporteve të VNM-ve; Si pasojë e heshtjes nga Ministria përgjegjëse, me datë 27 shtator 2023 CorrWatch është ankuar në Agjencinë për Informim dhe Privatësi (AIP).
“Mirëpo edhe pas vendimit të AIP-së për lejim të qasjes, Ministria përgjigjet duke pohuar se të gjitha gjinden në faqen e tyre zyrtare, duke injoruar faktin që kërkesa është bërë pasi është hulumtuar faqja zyrtare dhe është identifikuar mungesa e këtyre dokumenteve.
Më 1 nëntor, AIP e shpall të mbyllur procedurën administrative – shqyrtimin e ankesës të ngritur nga CorrWatch. Mohimi i pjesëmarrjes aktive, mospërpuethshmëria në numrin e lejeve, mospublikimi i raporteve të VNM-së, aprovimi pa kontroll të cilësisë, mungesa e përditësimit të listës së licencuarve dhe mos hapja e konkurseve për vite radhazi, rezultojnë në mungesë të transparencës dhe krijojnë hapësirë për korrupsion,” thuhet në njoftim.
CorrWatch thërret Ministrinë e Mjedisit të përditësojë urgjentisht listën e të licencuarve, të publikojë një listë të zezë për licencat e pezulluara dhe të lëshojë dokumente relevante si dhe fton organet e drejtësisë të ndërmarrin masat e nevojshme për zgjidhjen e çështjeve të ngritura./Katror.info
Përgatiti:
