Në këtë kohë kur industria globale e modës përballet me kritika për ndotje, abuzim të kafshëve dhe mungesë transparence, një iniciativë britanike po ofron një vizion ndryshe – një mënyrë për të bërë modë që shëron tokën në vend që ta dëmtojë.
British Pasture Leather, themeluar nga Alice Robinson dhe Sara Grady, po udhëheq një revolucion të qetë në botën e lëkurës. Përmes praktikave të bujqësisë rigjenerative, ato po rikthejnë lidhjen mes fermës dhe modës, duke krijuar një material që jo vetëm është i qëndrueshëm, por edhe me ndikim pozitiv në mjedis.
Grady, një veterane e fushës së bujqësisë etike, dhe Robinson, një dizajnere kërkimore që ndërthur modën me qëllim, nisën këtë nismë katër vite më parë.
Mundesh me e lexu edhe…
“Ne donim të krijonim një furnizim me lëkurë që vinte nga bagëti të ushqyera vetëm me kullotë në Mbretërinë e Bashkuar. Këto janë ferma që ndjekin parime rigjenerative – toka e tyre rrit biodiversitetin, përmirëson shëndetin e tokës dhe ul ndotjen e ujërave”, shpjegon Grady.
Lëkura përpunohet në Thomas Ware & Sons Ltd në Bristol – një nga të tre të vetmet që ende përdor metoda tradicionale me bimë. Kjo teknikë shmang përdorimin e kromit dhe kimikateve toksike që ndotin ujërat, duke prodhuar një material që mund të biodegradohet në mënyrë natyrale.
Në tetor, British Pasture Leather prezantoi MADE WITH, një koleksion bashkëpunues me disa prej studiove më të njohura britanike – nga Been London dhe Francli Craftwear, deri te Beorma dhe OTZI. Çdo produkt, qoftë një çantë, një stol apo një rrip, është bërë tërësisht nga lëkurë britanike e rigjeneruar, e përpunuar pa kimikate sintetike.
Një nga bashkëpunëtorët më të spikatur është Alex Simpson, ish-specialist i çminimit të bombave në Lindjen e Mesme. Pas kthimit në MB, ai themeloi markën Beorma, e cila prodhon çanta dhe rripa me lëkurë britanike.
Në qendër të këtij transformimi qëndrojnë fermerët si Ian Boyd nga Whittington Lodge Farm, i cili ka 55 vjet përvojë.
“Kam mësuar ta shoh bujqësinë ndryshe. Ne përdorim çdo pjesë të kafshës me respekt. Lëkura që del nga fermat tona është pjesë e një cikli që ushqen tokën dhe njerëzit”.
Boyd është krenar që është pjesë e një lëvizjeje që tregon se bujqësia mund të jetë pjesë e zgjidhjes për krizën klimatike. /AP/Katror.info
