A ndihesh ndonjëherë sikur koha fluturon dhe dita kalon më shpejt se sa e kupton?
Ky fenomen është një përvojë e zakonshme dhe shpesh lidhet me rutinat e përditshme, të cilat e bëjnë trurin të mos i regjistrojë momentet në të njëjtën mënyrë si dikur.
E mira është që ka mënyra për të “ngadalësuar” këtë perceptim, duke rikthyer ndjesinë e kohës së përjetuar plotësisht. Ja disa mënyra që mund të ndihmojnë:
1. Krijo përvoja të reja dhe dil nga rutina
Truri ynë është si një makinë që regjistron gjithçka të re, por kur gjërat bëhen rutinë, ai ndalon së regjistruari detajet. Kjo është arsyeja pse javët kalojnë shpejt dhe ditët duken njëlloj.
Për ta luftuar këtë, duhet të krijosh përvoja të reja. Kjo nuk do të thotë se duhet të bësh ndryshime të mëdha çdo ditë, por të provosh diçka të re, sado të vogël, pasi mund të jetë e mjaftueshme. Provo një shëtitje në një park të paeksploruar ose një aktivitet të ri, të gatuash diçka ndryshe ose të lexosh një libër që e ke lënë për muaj me radhë në raft.
Këto aktivitete të reja jo vetëm që do ju krijojnë kujtime të reja ditë pas dite, por gjithashtu do ju kthejnë dëshirën për të pasur më tepër ditë ndryshe dhe të pasura me përvoja.
2. Jeto me më shumë vetëdije
Ndërsa jemi shpesh të zënë duke menduar për të nesërmen apo për çështjet e së kaluarës, harrojmë të jetojmë në të tashmen. Praktika e vetëdijesndihmon që të përjetosh çdo moment plotësisht.
Në vend që ta lësh ditën të rrjedhë pa menduar, ndalo herë pas here dhe përqendrohu te ndjesitë e tua – çfarë ndien, çfarë sheh dhe çfarë dëgjon. Kjo të ndihmon të regjistrosh momente të plota dhe të përqendrosh trurin te ato.
Shembull: Kur je duke pirë kafen e mëngjesit, ndalu dhe shijo çdo gllënjkë. Vëzhgo mënyrën si drita depërton nëpër dritare dhe si ndihet aroma e kafesë. Kjo praktikë e thjeshtë të ndihmon të jetosh më plotësisht çdo moment.
3. Shkruaj kujtimet e ditës
Një tjetër mënyrë për të ngadalësuar perceptimin e kohës është të mbash një ditar të përvojave ditore. Kur regjistron përjetimet e tua, jo vetëm që e rrit ndërgjegjësimin për momentet, por edhe do të të nxisë të rikthehesh pas për t’i përjetuar ato sërish.
Ky veprim të ndihmon të përpunosh ngjarjet e ditës dhe të krijosh kujtime më të qëndrueshme.
Shembull: Çdo mbrëmje, para se të shkosh për të fjetur, shkruaj tri gjëra që të kanë bërë të ndihesh mirë gjatë ditës. Qoftë një bisedë e këndshme, një pamje e bukur, apo një gjë e vogël që ke vënë re. Këto kujtime do të nguliten në mendjen tënde.
4. Kufizo përdorimin e teknologjisë
Shpesh, ndjenja se koha po ikën ka lidhje me shpërqendrimet nga teknologjia. Kur kalon shumë kohë para ekranit, ditët kalojnë më shpejt sepse përvojat virtuale nuk kanë të njëjtin ndikim në trurin tonë si ato të vërteta.
Duke e kufizuar kohën e shpenzuar në telefon ose kompjuter, mund ta përdorësh kohën për gjëra që të bëjnë të ndihesh më i plotësuar dhe më i pranishëm.
Provo të vendosësh një orar për përdorimin e teknologjisë. Vendos një orar specifik kur e lë telefonin mënjanë dhe përqendrohesh te aktivitetet e tjera – qoftë një bisedë me miqtë, një shëtitje apo një hobi që të pëlqen.
5. Planifiko aktivitete me qëllim
Koha mund të kalojë shpejt kur je i/e zënë me aktivitete që nuk kanë një qëllim të qartë. Një mënyrë për të ndjerë se po e përdor kohën me efikasitet është të krijosh një plan qëllimor për ditën tënde. Duke vendosur qëllime të vogla dhe të arritshme ndihesh më i/e plotësuar dhe dita nuk kalon pa motiv. Kjo e bën edhe kalimin e kohës më kuptimplotë.
Shembull: Në vend që dita jote të jetë e gjitha spontane, cakto tri gjëra që dëshiron t’i arrish. Këto mund të jenë qëllime të thjeshta si leximi i një kapitulli të ri nga një libër apo një bisedë me një mik të afërt, citon Anabel.
Duke u përqendruar te përjetimet e reja, vetëdija dhe kufizimi i shpërqendrimeve, mund të rigjesh një sens të plotësisë dhe të ngadalësosh ndjesinë që koha po ikën shumë shpejt. Duke ndryshuar mënyrën si e përjeton çdo ditë do të krijosh përvoja të paharrueshme dhe kuptimplota!
Përgatiti:
