Ceremonia e ndarjes së “Topit të Artë 2025” do të mbahet sonte në Theatre du Chatelet në Paris, duke filluar nga ora 20:00.
Emri i fituesit mbahet ende sekret dhe dihet vetëm nga kryeredaktori i “France Football”, Vincent Garcia.
Në garë janë 30 kandidatë, por dy favoritë dallohen mbi të tjerët: Ousmane Dembele i Paris Saint-Germain, i cili sezonin e kaluar fitoi tripletën, dhe talenti i Barcelonës, Lamine Yamal, i cili po shkëlqen me klubin dhe përfaqësuesen e Spanjës.
Mundesh me e lexu edhe…
Këtë vit çmimi jepet mbi bazën e performancës së plotë sezonale, duke vënë në plan të parë nivelin individual, talentin dhe sportivitetin, ndërsa trofetë kolektivë kanë rol dytësor.
Risia tjetër është zvogëlimi i numrit të votuesve: për meshkujt votojnë vetëm 100 gazetarë nga 100 vendet më të mira sipas renditjes së FIFA-s, ndërsa për femrat janë 50 votues.
Ceremoninë do ta udhëheqë Ronaldinho, i cili do të dorëzojë edhe çmimin kryesor. Përveç ‘Topit të Artë’, do të ndahen edhe trofetë për portierin më të mirë, golashënuesin më të mirë dhe futbollistin më të mirë të ri.
‘Topi i Artë’ jepet që nga viti 1956. Lionel Messi mban rekordin me tetë ‘Topa të Artë’, ndërsa Cristiano Ronaldo ka pesë sosh./RTK/Katror.info
