Sot pritet që deputetët e Kuvendit të Kosovës të tentojnë për të dhjetën herë konstituimin e legjislaturës së nëntë.
Janë bërë pothuajse tre muaj nga përfundimi i zgjedhjeve, ndërsa institucionet e reja të Kosovës vazhdojnë të mbesin të pakonsoliduara. Përplasjet mes pozitës dhe opozitës po thellohen, duke çuar kështu vendin drejt bllokadës politike. PDK e LDK vazhdojnë të kenë qëndrime të njëjta.
Deputeti i Vetëvendosjes, Hekurani Murati, ka dalë me një propozim tjetër për të dalë nga ngërçi politik. Ai ka thënë se në këtë seancë do të duhej të zgjidhej së pari Kryesia e Kuvendit.
Mundesh me e lexu edhe…
“Për dallim prej qeverisë, ku vetëm koalicioni qeverisës i merr të gjitha pozitat në ekzekutiv, në Kuvend pushteti ndahet tek të gjitha partitë. Pra nuk i merr të gjitha pozitat e kryesisë koalicioni qeverisës që bën 61 vota, por pozitat e kryesisë ndahen tek të gjitha partitë. Në njëfarë forme, hartuesit e Kushtetutës kanë dashur të balancojnë pushtetin legjislativ duke imponuar, nëse mund të quhet kështu, një Koalicion Konstituiv para se të kalohet tek Koalicioni Qeverisës. Kryetari dhe një Nënkryetar i takojnë partisë më të madhe, një Nënkryetar i takon partisë së dytë, një Nënkryetar i takon partisë së tretë, dhe dy Nënkryetarë u takojnë partive që përfaqësojnë komunitetet jo-shumicë.”
“Prandaj nuk ka kuptim që edhe më tutje të stërzgjatet diçka që është e përcaktuar në Kushtetutë. I kemi dëgjuar përfaqësuesit e PDK-së dhe LDK-së teksa thonë që për pozitën e Nënkryetarit e cila u takon atyre me Kushtetutë, s’e shohin të nevojshme të diskutojnë se kë e propozoinë kandidat. Të njëjtën gjë po e themi edhe ne për pozitën që na takon nga po i njëjti Nen i Kushtetutës – Neni 67. Çfarëdo zvarritje a bllokade e mëtutjeshme e partive tjera duke votuar kundër konstituimit të Kuvendit, tashmë është e tepruar dhe e panevojshme. Çfarëdo mesazhi që kanë dashur të përçojnë me votën e tyre kundër tash e disa seanca, le ta konsiderojnë të përçuar. Por nesër, le ta zgjedhim Kryesinë e Kuvendit,” ka shkruar ai në Facebook.
Blerta Deliu nga Partia Demokratike e Kosovës është kundër ndryshimit të procedurave.
“Një proces që ka filluar tash e sa kohë, që është procesi i votimit për të zgjedhur kryekuvendarin, të provojë që të ndikojë në procedurat e brendshme të kuvendit e të ndryshojë formën e votimit. Kjo nuk ndodhë në asnjë shtet demokratik dhe nuk ka ndodhur asnjëherë në Republikën e Kosovës dhe është një precedent i rrezikshëm për mënyrën se si këta e shohin shtetin, e shohin ligjin dhe si e shohin Kushtetutën e Republikës së Kosovës”, tha Blerta Deliu, deputete e PDK-së.
Armend Zemaj, deputet nga LDK-ja tha se ky është abuzim me pozitën që i ka dhënë Rregullorja e Punës së Kuvendit. “Është sjellje e papranueshme, në fund të fundit është edhe denigrim edhe i personalitetit të individit, por është një strategji abuzive të cilën po e përdorë LVV-ja për të bllokuar krijimin e institucioneve të reja”, tha ai.
Ndërkohë kreu i AAK-së Ramush Haradinaj tha se nëse Vetëvendosje e nxjerrë një figurë unifikuese nesër do të kenë kryetarin ose kryetaren e Kuvendit. I pyetur nëse do të votonin Glauk Konjufcën po që se do të kandidonte, Haradinaj tha: “Nuk kemi biseduar për Glaukun, por nuk është problem, besoj po”, tha ai.
Por, analistët politikë paralajmërojnë pasoja serioze për funksionimin e demokracisë. Zgjidhja, sipas tyre, mund të gjendet vetëm përmes një marrëveshjeje të gjerë ndërpartiake.
“Kryeministri në detyrë nuk po bisedon në mënyrë normale me opozitën e deritashme, mirëpo as opozita e deritashme nuk po bisedon me vetveten. Kështu që ekziston një hapësirë, një hendek shumë i madh në mes të akterëve dhe nuk ka aspak indikacione për normalitet, racionalitet dhe për një vendim i cili do të ishte në përputhje me pritshmëri të qytetarëve duke pasur parasysh edhe krizën e madhe ekonomike e cila çdo ditë e më tej po thellohet”, tha Artan Muhaxhiri, raporton RTKlive.
Për analistin, Arbnor Sadiku, e vetmja mundësi do të ishte një koalicion i madh, e nëse kjo nuk bëhet, rruga tjetër, sipas tij, janë zgjedhjet..
“E vetmja mundësi do të ishte një koalicion i madh që LDK-ja refuzoi dhe si duket janë vështirësuar gjërat, e vetmja rrugë ka mbetur që me PDK-në të bëhet një koalicion. Nëse kjo nuk bëhet unë nuk po shoh rrugë tjetër përveç zgjedhjeve të jashtëzakonshme”, tha Sadiku për RTK-në.
Muhaxhiri e Sadiku nuk e shohin të drejtë votimin e fshehtë të cilin e përkrah Lëvizja “Vetëvendosje”, duke i kujtuar kësaj të fundit që në të kaluarën kërkonte shumë transparencë./RTK/Katror.info/
