Pirja e çajit të zi mund të zvogëlojë rrezikun e vdekjes së hershme nga sëmundjet e zemrës. Një ekip hulumtues në SHBA i udhëhequr nga Dr. Maki Inoue-Choi i Institutit Kombëtar të Shëndetit të Institutit Kombëtar të Kancerit, hulumtoi lidhjen midis pirjes së çajit dhe vdekshmërisë në Mbretërinë e Bashkuar, duke përdorur të dhëna për 500,000 njerëz të moshës 40-69 vjeç, shkruan Good News Network
Njerëzit që pinin dy ose më shumë filxhanë në ditë u zbulua se kishin një rrezik 9 deri në 13 për qind më të ulët të një vdekjeje të hershme nga sëmundjet kardiovaskulare ose goditjet në tru, krahasuar me ata që nuk pinë çaj.
Lidhja u gjet pavarësisht nëse pjesëmarrësit pinin gjithashtu kafe, shtonin qumësht ose sheqer në çajin e tyre, temperaturën e preferuar të çajit dhe efektin e demografisë, stilit të jetesës, si dhe gjeneve që përcaktojnë se sa shpejt njerëzit metabolizojnë kafeinën.
Mundesh me e lexu edhe…
Studimet e mëparshme kanë treguar një lidhje midis pirjes së çajit jeshil dhe zvogëlimit të vdekshmërisë në popullatat aziatike, duke përfshirë edhe kancerin, por studimet e pakta që janë bërë mbi popullatat që pinë çaj të zi kanë prodhuar rezultate të përziera.
Pjesëmarrësit plotësuan pyetësorët që mbulonin informacionin demografik, mënyrën e jetesës dhe shëndetin. Kjo përfshinte numrin e filxhanëve të çajit që pinin çdo ditë. Studiuesit ndoqën pjesëmarrësit për periudhën 14-vjeçare të studimit, deri në fillim të vitit 2020. Për ata që vdiqën gjatë kësaj kohe, studiuesit morën të dhëna dhe shkakun e vdekjes nga Shërbimi Shëndetësor Kombëtar i Mbretërisë së Bashkuar.
Studiuesit zbuluan një rrezik 9-13% më të ulët të vdekjes tek njerëzit që pinin të paktën 2 filxhanë çaj në ditë sesa tek ata që nuk pinë çaj. Pirja e çajit u shoqërua me zvogëlimin e vdekshmërisë nga sëmundjet kardiovaskulare dhe goditjet në tru – por jo ndonjë reduktim nga kanceri ose sëmundjet e frymëmarrjes sesa ata që nuk pinë çaj.
“Rezultatet sugjerojnë se çaji, duke përfshirë çajin e zi, mund të jetë pjesë e një diete të shëndetshme,” thotë autorja Dr. Erikka Loftfield e NCI, e cila botoi rezultatet në numrin e shtatorit 2022 të Annals of Internal Medicine.
Por, studiuesit paralajmërojnë se studimi është observues dhe nuk mund të provojë se pirja e çajit ul drejtpërdrejt rrezikun e vdekjes.
Ata gjithashtu nuk vlerësuan disa aspekte të pirjes së çajit, të tilla si madhësia e filxhanit dhe koncentrimit të çajit, të cilat mund të jenë të rëndësishme.
Do të nevojiten studime të mëtejshme për të përcaktuar nëse dhe si çaji redukton rrezikun e vdekjes.
Por, Inoue-Choi përfundoi: “Nëse pini çaj tashmë, mund të keni përfitime prej tij.”
Përgatiti:
