Tango, një vallëzim që ka kaluar nëpër dekada, ka vazhduar të pushtojë zemrat e atyre që e kërkojnë pasionin dhe lidhjen e thellë mes trupit dhe muzikës.
Kjo formë arti ka kthyer çdo hap, çdo lëvizje, dhe çdo pëshpërimë të saj në një gjuhë universale, që flitet në çdo kulturë dhe Kosova nuk bënë dallim.
Dafina Rudi thekson për Albanian Post rëndësinë e organizimit të ngjarjeve që shtynë përpara këtë formë arti duke thënë se shkon përtej vetëm një vallëzimi.
Mundesh me e lexu edhe…
“Natyrisht që ka rëndësi të madhe pasi që Tango përveç se një vallëzim, është sikur meditim për dy persona. Kultura, qëndrimi trupor, hapësira socializuese e shumëçka tjetër që ju përfitoni nga Tango i jep rëndësi të veçantë këtij lloj vallëzimi shumë unik” u shpreh Rudi.
Në ngjarje e organizuar me datën 21 mars, “Evolution Dance Kosovo”, ka ftuar gjithashtu valltar nga Shkupi dhe Turqia për t’ju dhënë artdashësve një perspektivë krejtësisht të re.
“Është me rëndësi për gjithë të pranishmit jo vetëm valltarët të shohin si duket një Tango, ta përjetojnë atë dhe të provojnë në workshop hapat e parë” shtoi ajo.
Kur shihet si një aktivitet rekreativ, kërcimi është shumë më tepër se thjesht lëvizje fizike.
Ajo ndërthur lëvizjen e sinkronizuar me përvojën e përbashkët shoqërore e disa e klasifikojnë si vet jeta.
“Për mua personalisht është stil i jetës, vetë jeta. Nuk e di si do isha formuar sot po që se nuk kishte me hy vallëzimi në jetën time që 23 vite” tha artistja.
Tango mbetet një nga artet më të veçanta të vallëzimit, një përzierje e ndjenjave, disiplinës dhe komunikimit të heshtur mes dy trupave që lëvizin në harmoni.
Nuk është thjesht një koreografi, por një përvojë që transformon ata që e përjetojnë, duke i lidhur përtej ritmit dhe hapave. Qoftë si një formë arti, si një mënyrë socializimi apo si një udhëtim personal, tango vazhdon të sfidojë, frymëzojë dhe të krijojë lidhje të reja në çdo cep të botës.
Dhe ndoshta, bukuria e tij qëndron pikërisht në këtë: një vallëzim që nuk përfundon kurrë, por vazhdon të jetojë me çdo hap të ri që hidhet në ritmin e tij të pandalshëm./Katror.info
Përgatiti:
