Ka një moment çdo verë kur Prishtina nuk është më thjesht një kryeqytet — ajo bëhet një pasarelë e gjallë nën dritat e skenës së Sunny Hill Festival.
Ndërmjet dritave që pulsojnë dhe zhurmës së këpucëve në pluhur lind një pyetje thelbësore: Çfarë të veshim?
Përgjigjen e jep dizajnerja e modës Jetmira Bejtullahu, e cila përmes këtij artikulli ju udhëzon për “Dos and Don’ts”.
Mundesh me e lexu edhe…
Bejtullahu, në një intervistë për Albanian Post, vuri në pah se stili i veçantë dhe karizma e fuqishme e Dua Lipës frymëzojnë shumë vajza që, për festivalin, të mendojnë përtej veshjeve të zakonshme – dhe të bëjnë zgjedhje kreative dhe komode njëkohësisht.
“Këtë vit në Sunny Hill besoj se do të shfaqen shumë kapele dhe çizme coëboy, shami të lidhura në kokë, glitter në rroba dhe makeup, si dhe xhaketa të mëdha për netët e freskëta. Mendoj gjithashtu se do të përdoren crop topa me shkëlqim, pantallona të gjera dhe aksesorë me perla e rruaza, që krijojnë një stil festiv dhe me shumë ngjyra”, u shpreh artistja.
Përveç ndjekjes së trendëve, një aspekt thelbësor në përzgjedhjen e veshjeve për festival mbetet ruajtja e stilit personal dhe përshtatshmëria me kushtet praktike.
Të jesh rehat në veshjen tënde gjatë një festivali është thelbësore për ta shijuar plotësisht përvojën.
Festivali është një ngjarje që zgjat me orë të tëra, shpesh në kushte të ndryshme moti dhe me shumë lëvizje, ndaj veshja duhet të jetë funksionale dhe e përshtatshme për trupin.
“Më e rëndësishmja është të mos dalim jashtë stilit tonë personal. Mund të fusim disa nga trendet e fundit dhe aksesorë që i japin pamje festive, pa tepruar. Veshjet rehatshme, si pantallona të lira dhe crop topa nga materiale të lehta, janë ideale për ditën”.
“Për netët e freskëta, xhaketa oversized prej lëkure dhe çizme apo sneakers të rehatshme janë zgjedhja perfektë”, tha Bejtullahu, duke shtuar se “po ashtu, fustanat e gjatë maxi nga materiale si silk dhe chiffon janë një zgjedhje perfekte për një look elegant e feminin”.
Në një festival, ku rehatia dhe stili duhet të ecin paralelisht, e pyetëm dizajneren të na tregojë tri gjërat esenciale që nuk duhet t’i harrojmë kurrë.
Por, si duket, tri nuk mjaftojnë. Siç thotë edhe Michael Kors “aksesorët janë pika kulmore e veshjes së një gruaje”.
Kjo na kujton se aksesorët janë jo vetëm funksionalë, por edhe elementë që i japin personalitet dhe stil çdo veshjeje, duke e kompletuar atë në mënyrë perfekte për një ditë festivali plot ngjyra dhe energji.
“Aksesoret që duhet të ketë çdo look festiv janë kapelat ose shamia për kokë, aksesorët me shkëlqim si varëse dhe byzylykë, dhe një çantë e vogël cute dhe praktike. Edhe syze mos t’i harrojmë! U bënë katër”, tha ajo.
Vetë-shprehja përmes veshjes është një gjuhë pa fjalë, që zbulon identitetin, humorin dhe stilin unik të secilit prej nesh.
Rehatia, nga ana tjetër, shkon përtej thjesht komoditetit fizik; ajo është një akt respekti ndaj vetes, që na lejon të jemi autentikë dhe të shprehim lirshëm personalitetin tonë pa barriera.
Kur këto dy elemente bashkohen në një formë arti, siç është rasti në këtë edicion të Sunny Hill Festival, përvoja juaj bëhet më e plotë, duke kombinuar stilin me ndjesinë e lirive të pakufizuara./AP/Katror.info
