Pas një dite të parë të mbushur me energji, përballje të forta dhe atmosferë ndërkombëtare, sot ka nisur dita e dytë e turneut ndërkombëtar të pingpongut Prishtina Open 2025, që po zhvillohet në Pallatin e Rinisë dhe Sportit në Prishtinë.
Mbi 250 pingpongistë nga 25 shtete të ndryshme janë bërë pjesë e këtij edicioni të tretë të turneut, duke e bërë Prishtinën qendër të vëmendjes në skenën ndërkombëtare të këtij sporti. Në ditën e dytë pritet të zhvillohen ndeshjet e kategorisë U13 dhe ndeshje në fazën e grupeve, ku lojtarët më të mirë do të garojnë për t’u kualifikuar ne fazën e eliminimit.
Përveç garës së ashpër në tavolinë, turneu po sjell edhe një frymë miqësie e bashkëpunimi ndërkulturor mes pjesëmarrësve dhe vizitorëve. Tribunat janë me dashamire te pingpongut, ndërsa organizimi dhe mikpritja nga Klubi i Pingpongut Priping, si organizator i ngjarjes, po vlerësohen lart nga të gjithë të pranishmit.
Mundesh me e lexu edhe…
Organizatori i turneut u shpreh se është shumë i lumtur më ecurinë e ditës së pare të turneut dhe tregoi se do të zhvillohen mbi 550 ndeshje pingpongu.
“Dita e parë filloi shumë mirë, hapja është bërë në një mënyrë të veçantë, ku lojtari më i ri i turneut 5 vjeçari Jon Matoshi u ndesh miqësisht me veteranin Shaip Reçica i cili është 80 vjeçar për të vazhduar pastaj me ndeshjet e rregullta. Gjatë këtyre tri ditëve do të zhvillohen mbi 550 ndeshjë në 9 tavolina pingpongu” u shpreh Kastriot Orana, kryetar i KPP Priping për RTK.
‘Prishtina Open 2025’ po konfirmon edhe një herë statusin e tij si një prej ngjarjeve më të rëndësishme sportive në rajon, me përfaqësim të gjerë, nivel të lartë të garës dhe një organizim profesional që e promovon Kosovën si destinacion sportiv ndërkombëtar./Katror.info
