Një lloj i ri i terapisë së kancerit që përdor një virus të zakonshëm për t’i infektuar dhe shkatërruar qelizat e dëmshme po duket të jetë premtues bazuar në eksperimentet e hershme te njerëzit, thonë shkencëtarët britanikë, raporton BBC.
Te një pacient kanceri u zhduk, ndërsa të tjerët ishin dëshmitarë që tumoret e tyre po zvogëloheshin.
Ilaçi është një formë e dobësuar e virusit të ftohjes – herpes simplex – që është modifikuar për t’i vrarë tumoret.
Do të nevojiten studime më të gjera dhe të gjata, por ekspertët thonë se injeksioni në fund mund të ofrojë një shpëtim për më shumë njerëz me kancer të avancuar.
Krzysztof Wojkowski, një punëtor ndërtimtarie 39-vjeçar nga Londra perëndimore, është një nga pacientët që mori pjesë në eksperimentin nw në fazën e parë, të drejtuar nga Instituti i Kërkimit të Kancerit dhe Fondacionin Royal Marsden i Shërbimit britanik Kombëtar të Shëndetësisë (NHS) Trust.
Ai u diagnostikua në vitin 2017 me kancer të gjëndrave të pështymës, pranë gojës. Pavarësisht operacionit dhe trajtimeve të tjera në atë kohë, kanceri i tij vazhdoi të rritet.
“Më thanë se nuk kishte alternativa për mua dhe po trajtohesha me terapinë e fundit të jetës. Ishte shkatërruese, kështu që ishte e pabesueshme të më jepej shansi që të bëhesha pjesë e kësaj prove”.
Aplikimi i shkurtër i terapisë së virusit – që është një version i modifikuar posaçërisht i virusit herpes i cili normalisht shkakton ftohje të lehtë – duket se e ka pastruar kancerin e tij.
“Kam bërë injeksione çdo dy javë për pesë javë, të cilat ma zhdukën plotësisht kancerin. Unë jam pa kancer për dy vjet tani”.
Injeksionet, të dhëna direkt në tumor, e sulmojnë kancerin në dy mënyra – duke i pushtuar qelizat kancerogjene dhe duke i bërë ato të shpërthejnë, dhe duke e aktivizuar sistemin imunitar.
Ne eksperiment morën pjesë rreth 40 pacientë. Disave iu dha injeksioni i virusit, i quajtur RP2. Të tjerë gjithashtu morën një ilaç tjetër kundër kancerit – të quajtur nivolumab – gjithashtu.
Studiuesi kryesor, Prof Kevin Harrington i tha BBC-së se rezultatet e trajtimit të parë ishin “vërtet mbresëlënëse” në një sërë kanceresh të avancuara, duke përfshirë kancerin e zorrës së trashë (ezofagit) dhe një lloji të rrallë të kancerit të syrit.
Nuk është hera e parë që shkencëtarët përdorin një virus për ta luftuar kancerin. Shërbimi Kombëtar Shendetësor britanik (NHS) miratoi një terapi të bazuar në virusin që shkakton ftohje, të quajtur T-Vec, për kancerin e avancuar të lëkurës disa vite më parë.
Prof Harrington e quan RP2 një version të ri të T-Vec.
“Ka pasur modifikime të tjera të virusit, në mënyrë që kur të futet në qelizat e kancerit të nënshkruajë në mënyrë efektive urdhërin e tyre të vdekjes”.
Dr. Marianne Baker, nga Cancer Research UK, tha se gjetjet inkurajuese mund ta ndryshojnë kursin e trajtimit të kancerit.
“Shkencëtarët qysh para 100 vjetësh zbuluan se viruset mund të ndihmojnë në trajtimin e kancerit, por ka qenë sfiduese për t’i shfrytëzuar ato në mënyrë të sigurt dhe efektive.
Kërkimet sugjerojnë se kombinimi i trajtimeve të shumta është një strategji e fuqishme dhe terapitë e viruseve si kjo mund të bëhen pjesë e mjeteve tona për të mposhtur kancerin,” tha Baker./Katror.info
Përgatiti:
