Një muaj deri në fund të vitit, dihet se në vitin 2023 bota do të arrijë ngrohjen globale prej rreth 1.4 gradë Celsius mbi nivelet para-industriale, njoftoi Organizata Botërore Meteorologjike (WMO). Raporti i përkohshëm i WMO për gjendjen e klimës globale konfirmon se viti 2023 do të jetë viti më i ngrohtë i regjistruar, me një diferencë të madhe krahasuar me vitin më të ngrohtë deri më sot.
Në vitin 2016, bota ishte rreth 1.2 gradë Celsius mbi mesataren para-industriale.
“Nivelet e gazit serrë janë në një rekord të lartë. Temperaturat globale janë në një rekord të lartë. Rritja e nivelit të detit është në një rekord të lartë. Akulli i detit Arktik është në një nivel rekord të ulët,” tha Sekretari i Përgjithshëm i WMO, Petteri Taalas.
Megjithatë, rezultatet e raportit nuk nënkuptojnë se bota do të kalojë pragun afatgjatë të ngrohjes prej 1.5 gradë Celsius, për të cilin shkencëtarët thonë se është kufiri i sipërm për shmangien e ndryshimeve katastrofike klimatike, sipas Marrëveshjes së Parisit të vitit 2015.
Këtë vit, akulli i detit Arktik arriti shtrirjen maksimale dimërore më të ulët të regjistruar. Ishte rreth 1 milion kilometra katror më i vogël se në vitin rekord të mëparshëm. Akullnajat e Zvicrës kanë humbur rreth 10 për qind të vëllimit të tyre të mbetur në dy vitet e fundit, thuhet në raport, ndërsa zjarret kanë djegur një zonë rekord në Kanada, e cila përbën rreth 5 për qind të sipërfaqes pyjore të Tokës. Ndryshimet klimatike, të nxitura nga djegia e lëndëve djegëse fosile, të kombinuara me shfaqjen e fenomenit natyror El Nino në Paqësorin lindor, ndikuan në të dhënat e lartpërmendura. Viti i ardhshëm mund të jetë më i keq, thonë shkencëtarët, pasi ndikimi i El Ninos ka të ngjarë të arrijë kulmin këtë dimër dhe të çojë në temperatura më të larta në 2024. /Katror.info
Përgatiti:
