Artisti i njohur shqiptar, Yll Limani, ka dhuruar 10 mijë euro për projektin “DokuFest Green Cinema”, një nismë që synon krijimin e një kineme tërësisht të qëndrueshme dhe miqësore me mjedisin. Kontributi i tij u bë vetëm pak orë para se të ngjitej në skenën e DokuNights, duke e bërë prezencën e tij në festival edhe më domethënëse, shkruan Katror.info.
“Solar Cinema” i DokuFest-it, i njohur dhe i shpërblyer ndërkombëtarisht, ka ofruar për vite me radhë shfaqje filmash falas në ambiente të hapura, duke mbërritur edhe në zonat më të largëta të Kosovës. Me mbështetjen e Limanit, festivali hap një kapitull të ri: një kinema që funksionon krejtësisht me energji të pastër, duke ruajtur parimet e qëndrueshmërisë dhe kujdesit për natyrën.
DokuFest ka shprehur mirënjohje për gjestin e artistit dhe ka ftuar edhe figura të tjera publike, kompani dhe individë të bashkohen në këtë iniciativë që synon jo vetëm të tregojë historitë e botës përmes filmit, por edhe të kontribuojë në ndryshimin e saj./Katror.info
