Ministri në detyrë i Kulturës së Kosovës, Hajrulla Çeku, ka njoftuar për një zbulim të rëndësishëm arkeologjik në lokalitetin e Ulpianës.
Ai ka thënë se ekipi i arkeologëve ka identifikuar një mbishkrim të dytë kushtuar Perandorit Justinian dhe bashkëshortes së tij, Teodora.
“Mbishkrimi i parë përmendte themelimin e qytetit Iustiniana Secunda si qytet Dardan. Ky i dyti tregon ndërtimin e bazilikës episkopale. Këto janë të vetmet dedikime të njohura të Justinianit, perandorit me prejardhje nga ky rajon,” njoftoi Çeku.
Mundesh me e lexu edhe…
Ministri theksoi se punimet në Ulpianë dhe në lokalitete të tjera si Dresniku po zhvillohen në toka publike të shpronësuara vitin e kaluar dhe se trashëgimia arkeologjike po trajtohet me seriozitet të lartë.
Aktualisht po punohet në konservimin dhe menaxhimin e lokaliteteve, me mbështetje nga partnerë ndërkombëtarë dhe me fokus në ngritjen e kapaciteteve profesionale, zhvillimin e studimeve dhe publikimeve shkencore.
Sipas Çekut, këto zbulime hedhin dritë mbi historinë e vendit dhe janë një dëshmi e rëndësishme për trashëgiminë kulturore të Kosovës. Ai ka theksuar përkushtimin për të vijuar kërkimet dhe mbrojtjen e pasurisë arkeologjike të vendit./Katror.info
