Nga 4 deri më 6 mars 2025, Kosova po merr pjesë në Panairin Ndërkombëtar të Turizmit “ITB Berlin” për të promovuar mundësitë e turizmit në vend, shkruan Katror.info.
Shtatë kompani kosovare nga sektori i turizmit janë duke prezantuar ofertat e tyre të veçanta në këtë panair. Ato përfshijnë Superxplorers, Balkan Destination, Swiss Diamond Hotel, Butterfly Outdoor Adventure, OutdoorKosova, Balkan Natural Adventure, dhe Kosovo Holidays.
Gjatë këtij panairi, vizitorët kanë mundësinë të zbulojnë aktivitete të ndryshme, si ecje malore, ekskursione në natyrë, vizita në destinacione kulturore dhe historike, si dhe mundësi të tjera për aventura të paharrueshme.
Mundesh me e lexu edhe…
Ministria e Industrisë, Ndërmarrësisë dhe Tregtisë (MINT), nëpërmjet Agjencisë për Investime dhe Përkrahjen e Ndërmarrjeve në Kosovë (KIESA), ka siguruar një hapësirë ekspozuese prej 69 m² për të shfaqur mundësitë e jashtëzakonshme që Kosova ofron për turizmin. Shtandi i Kosovës është një pikë e rëndësishme për agjencitë turistike dhe operatorët e industrisë që janë duke shprehur interes për potencialin turistik të vendit.
Ambasadori i Kosovës në Gjermani, Faruk Ajeti, dhe ambasadori i Maqedonisë së Veriut në Gjermani, Ylber Sela, vizituan gjithashtu stendën e Kosovës, duke shprehur mbështetje për promovimin e turizmit kosovar.
Pjesë e këtij panairi është edhe Uta Ibrahimi, alpinistja e njohur nga Kosova, e cila po prezanton bukuritë malore të Kosovës, duke e shndërruar vendin në një destinacion të preferuar për ecje malore.
Ky aktivitet është një mundësi ideale për zhvillimin e industrisë së turizmit dhe për rrjetëzimin mes profesionistëve të turizmit, duke mundësuar një shkëmbim idesh dhe promovimin e destinacioneve të reja. ITB Berlin ofron mundësinë që Kosova të njihet në skenën ndërkombëtare si një destinacion i pasur dhe i përshtatshëm për turizmin aktiv.
Vizitorët mund të vizitojnë stendën e Kosovës në Sallën 3.1, Nr. 104 dhe të zbulojnë mundësitë e shumta që Kosova ofron për të apasionuarit pas aventurave dhe natyrës./Katror.info
Përgatiti:
