94-vjeçarja që na mëson se asnjëherë nuk është vonë për të qenë aktiv

Një stërgjyshe plot energji, 94-vjeçarja Mary Marson, ndjek rregullisht klasat e Zumbës tri herë në javë dhe thotë se kurrë nuk është ndjerë më mirë me shëndetin e saj.

Ajo beson se sekreti i jetës së saj të gjatë dhe të shëndetshme është kombinimi i ushqimit organik me një stil jetese aktiv. Zumba, një stërvitje aerobike me muzikë dhe vallëzim latin, është bërë pjesë e pandashme e rutinës së saj javore, shkruan Good News Network, transmeton Katror.info.

E rritur në Xhamajkë dhe e shpërngulur në Angli në moshën 27-vjeçare, Mary thotë se përveç ndonjë të ftohti të lehtë, nuk ka pasur kurrë probleme shëndetësore serioze.

“Arrij t’i bëj të gjitha ushtrimet. Madje mund të përkulem e të prek dyshemenë!”, thotë ajo me krenari.

“Muzika më jep shumë energji dhe më motivon. Kam qenë gjithmonë një person pozitiv dhe kjo më mban të fortë. Thjesht nuk ndihem e moshuar!”, tha Mary.

Mary beson se edhe gjenetika ka luajtur rol, pasi prindërit e saj kanë jetuar gjatë.

Në qendrën rekreative Wavelengths në Deptford, ku ajo ndjek klasat, Mary është kthyer në një figurë frymëzuese për të gjithë komunitetin. Stafi e konsideron si pjesë të familjes dhe çdo vit, për ditëlindjen e saj, i organizojnë një festë të veçantë me tortë dhe tullumbace.

Mary u jep një mesazh të fortë bashkëmoshatarëve të saj: të mos kenë frikë të provojnë aktivitete fizike dhe të përfshihen në sport.

“Shumë të moshuar frenohen nga frika. Mendojnë: ‘Nuk mund të përzihem me të rinjtë,” tha Mary për SWNS.

“Ata e bëjnë veten të sëmurë duke qëndruar gjithë ditën ulur dhe duke menduar se nuk janë në gjendje të bëjnë gjë”, theksoi Mary.

“Unë do t’u thoja të provojnë! Ka shumë gjasa që të frymëzojnë të rinjtë përreth tyre. Dhe nuk do të pendohen!”, surgjeoi Mary.

Mary është burim krenarie për katër fëmijët e saj, katër nipërit dhe mbesat, si dhe pesë stërnipërit e saj.

Instruktorja e Zumbës, Topaz White, që udhëheq klasat ku merr pjesë Mary, thotë se ajo është një heroinë që i motivon të gjithë.

Me buzëqeshje dhe krenari, Topaz shton: “Të gjithë duhet të #JemiSiMary”./Katror.info