Në Prishtinë ka nisur edicioni i katërt i Panairit Ndërkombëtar të Turizmit “Kosova 2025”, një ngjarje që synon të promovojë vendin si një destinacion turistik me potencial të lartë dhe të forcojë bashkëpunimin ndërkombëtar në këtë sektor, shkruan Katror.info.
Panairi u organizua nga Unioni i Turizmit i Kosovës, me mbështetjen e Ministrisë së Industrisë, Ndërmarrësisë dhe Tregtisë (MINT), dhe nën përkujdesjen e Komunës së Prishtinës.
Në hapje të panairit morën pjesë përfaqësues të institucioneve shtetërore dhe të sektorit privat, përfshirë ministren në detyrë të Industrisë, Ndërmarrësisë dhe Tregtisë, Rozeta Hajdari, e cila theksoi rëndësinë e turizmit si një shtyllë kyçe për zhvillimin ekonomik të vendit dhe për ruajtjen e trashëgimisë kulturore. Ajo potencoi se gjatë mandatit aktual është shënuar një rritje prej 50% të numrit të turistëve në krahasim me periudhën 2017-2020.
Kryetari i Unionit të Turizmit të Kosovës, Baki Hoti, vlerësoi këtë edicion si një arritje të rëndësishme për industrinë e turizmit në vend. “Filluam me vetëm 60 kompani para katër vjetësh, ndërsa sot kemi mbi 340 kompani pjesëmarrëse nga 16 shtete të ndryshme, jo vetëm nga rajoni, por nga e gjithë bota,” tha ai. Sipas Hotit, vetëm në vitin e kaluar turizmi në Kosovë ka shënuar rritje prej 36.8%.
Edhe kryetari i Komunës së Prishtinës, Përparim Rama, theksoi përkushtimin e kryeqytetit për të krijuar një ambient mikpritës dhe të përshtatshëm për zhvillimin e turizmit, duke e konsideruar këtë sektor si një mundësi për zhvillim të qëndrueshëm.
Panairi, që mbledh kompani dhe institucione nga sektorë të ndryshëm të turizmit, shihet si një platformë për shkëmbim përvojash dhe krijim partneritetesh të reja, me synimin që viti 2025 të shënojë një tjetër hap përpara për turizmin në Kosovë./Katror.info
Përgatiti:
