Ylli i popit, Katy Perry, udhëtoi në hapësirë së bashku me pesë gra të tjera nëpërmjet raketës “New Shepard” të kompanisë Blue Origin, në një mision turizmi hapësinor që nisi nga Teksasi Perëndimor.
Në bord ishin edhe e fejuara e Bezos, Lauren Sánchez, gazetarja e CBS Gayle King, ish-inxhinierja e NASA-s Aisha Bowe, aktivistja Amanda Nguyen dhe producentja Kerianne Flynn.
Fluturimi zgjati rreth 11 minuta, duke kaluar kufirin e hapësirës dhe duke i dhënë ekuipazhit momente pa gravitet.
Mundesh me e lexu edhe…
Anija ishte plotësisht autonome, pa pilotë. Pas misionit, kapsula u kthye në Tokë me parashutë, ndërsa përforcuesi u ulë veçmas, vertikalisht.
Këngëtarja e njohur Katy Perry pas kthimit ka rrëfyer se ndien një lidhje të thellë me dashurinë pas pjesëmarrjes së saj në një udhëtim në hapësirë.
Ajo tha se kjo përvojë i ka hapur sytë për fuqinë e dashurisë që secili bart në vete: “Asnjëherë nuk e di sa shumë dashuri ke brenda vetes, sa shumë mund të japësh dhe sa shumë je i dashur.”
Pas kthimit në Tokë, Perry ngriti një lule margarita drejt qiellit – një lule që e kishte marrë me vete në kapsulë, sepse sipas saj është “e fortë, e fuqishme dhe e qëndrueshme”, shkruan Sky News.
Gjatë zbritjes nga hapësira, ajo nisi të këndojë këngën ikonike What a Wonderful World të Louis Armstrong. E pyetur pse zgjodhi pikërisht atë këngë, Perry tha:
“E kam interpretuar edhe më parë, dhe mendoj se ‘vetja ime e lartë’ e ka drejtuar këtë udhëtim. Nuk kishte të bënte me mua apo me këngët e mia, por me një energji kolektive që ndjemë të gjithë atje lart. Kishte të bënte me këtë botë të mrekullueshme që kemi përballë nesh, dhe me vlerësimin ndaj saj.”
Perry konfirmoi gjithashtu se do të shkruajë një këngë të frymëzuar nga kjo përvojë: “Ishte ndjesia më e lartë që kam përjetuar ndonjëherë.”
Blue Origin, e themeluar nga Jeff Bezos, synon të zhvillojë turizmin hapësinor dhe teknologjitë për misione të ardhshme, përfshirë raketa të ripërdorshme dhe sisteme uljeje hënore. /Katror.info
Përgatiti:
