Kanë mbetur edhe 100 ditë deri në fillimin e edicionit të ri të Sunny Hill Festival, një prej festivaleve më të mëdha të muzikës në rajon. Organizatorët kanë konfirmuar se publikimi i emrave të artistëve që do të performojnë këtë vit do të bëhet së shpejti, shkruan Katror.info.
Festivali, i cili këtë vit mbahet nga 1 deri më 3 gusht në Bërnicë të Epërme, tashmë ka filluar me shitjen e biletave. Në njoftimin për media, organizatorët kanë bërë të ditur se përgatitjet janë drejt finalizimit dhe se edicioni i sivjetmë do të sjellë një line-up të veçantë.
“Këtë vit kemi bërë gati një program të jashtëzakonshëm të artistëve të huaj dhe vendor që do ta bëjnë Prishtinën destinacionin kryesor të kësaj vere. Numërimi tashmë ka filluar. Shihemi në Sunny Hill Festival më 1, 2 dhe 3 gusht,” thuhet në njoftimin e festivalit.
Mundesh me e lexu edhe…
Sunny Hill Festival, i organizuar është nominuar nga Shoqata Evropiane e Festivaleve si një ndër Top 10 festivalet më të mira në Evropë, duke e rritur më tej rëndësinë e tij si ngjarje muzikore dhe kulturore në skenën evropiane.
Për të gjithë të interesuarit, biletat Believers, të cilat ofrohen me çmimin më të lirë të mundshëm prej 95 euro, janë ende në dispozicion.
Sunny Hill Festival është themeluar në vitin 2018 nga artistja me famë botërore Dua Lipa, së bashku me babain e saj, Dukagjin Lipa. Ky festival muzikor mbahet në Prishtinë, dhe është shndërruar në një prej ngjarjeve më të mëdha kulturore dhe muzikore në rajon, duke mbledhur emra të njohur të muzikës botërore dhe artistë vendorë në të njëjtën skenë.
Që nga fillimi, Sunny Hill është dalluar për atmosferën unike dhe përfshirjen e artistëve nga zhanre të ndryshme muzikore, duke sjellë në Kosovë emra si Calvin Harris, Martin Garrix, Action Bronson, Diplo, Stormzy, AJ Tracey, Skepta e shumë të tjerë. /Katror.info
Përgatiti:
