Komuna e Gjilanit ka nisur sot shpërndarjen e farës së misrit dhe plehut artificial për fermerët lokalë, në kuadër të mbështetjes institucionale për sektorin e bujqësisë, shkruan Katror.info.
Kryetari i Komunës, Alban Hyseni, bashkë me nënkryetaren Leonora Morina Bunjakun dhe drejtorin për Bujqësi, Bajram Isufi, kanë marrë pjesë në shpërndarjen e ndihmës bujqësore, e cila përfshin 800 thasë me farë misri dhe 1600 thasë me pleh artificial. Kjo ndihmë do të shërbejë për mbjelljen e mbi 400 hektarëve tokë bujqësore në territorin e komunës.
Hyseni tha se bujqësia mbetet prioritet strategjik për Komunën e Gjilanit dhe theksoi rëndësinë e kësaj përkrahjeje në kohën kur fermerët kanë më së shumti nevojë.
Mundesh me e lexu edhe…
“Shpërndamë farë misri dhe pleh artificial për 743 fermerë. Jemi krenarë që jemi ndër komunat e vetme në Kosovë që bëjmë shpërndarjen e këtyre inputeve në pranverë, kur ndihma ka efektin më të madh,” u shpreh ai.
Kryetari gjithashtu bëri të ditur se nga 760 aplikues, janë mbështetur 743, duke përfshirë edhe fermerë që nuk kanë përfituar më parë nga ndihma komunale.
“Kjo është përkrahje reale, në kohën e duhur, për ata që e punojnë dhe e mbajnë gjallë tokën tonë,” theksoi Hyseni.
Nga ana e tij, drejtori për Bujqësi Bajram Isufi sqaroi se shpërndarja e inputeve bujqësore është bërë në mënyrë të organizuar dhe transparente, me synimin që të përfitojnë ata që realisht janë aktivë në sektorin e bujqësisë.
Ky projekt vjen si pjesë e përkushtimit të Komunës së Gjilanit për të rritur prodhimtarinë bujqësore dhe për të mbështetur qëndrueshmërinë ekonomike të fermerëve lokalë./Katror.info
Përgatiti:
