Klubi Alpin Prishtina ka njoftuar zyrtarisht organizimin e edicionit të radhës të Prishtina Outdoor Festival, i cili do të mbahet nga 11 deri më 15 qershor 2025 në zonën piktoreske të Gollakut, me përkrahjen e Komunës së Prishtinës, shkruan Katror.info.
Ky festival i shumëpritur shënon një bashkim të dashurisë për natyrën, sportin, turizmin dhe komunitetin aktiv të kryeqytetit. Gjatë pesë ditëve, Prishtina Outdoor Festival do të ofrojë një mori aktivitetesh rekreative dhe sportive në ambiente të hapura, duke përfshirë klube alpinistike, shoqata, biznese të sektorit turistik dhe të gjithë entuziastët e jetës aktive.
Me qëllim promovimin e zonës turistike të Gollakut dhe zhvillimin e rekreacionit shëndetësor, festivali synon të nxjerrë në pah resurset natyrore dhe kulturore të rajonit, përmes një programi të pasur që ndërthur aventurën, muzikën, sportin dhe ndërveprimin komunitar.
Mundesh me e lexu edhe…
Në njoftimin e bërë publik nga Klubi Alpin Prishtina, festivali përshkruhet si një përvojë e paharrueshme, ku secili pjesëmarrës ftohet të kontribuojë në ndërtimin e kulturës rekreative në qytet përmes pjesëmarrjes aktive, ekspozimit të kreativitetit dhe promovimit të vlerave ambientaliste.
Organizatorët bëjnë thirrje për OJQ-të, bizneset e turizmit dhe komunitetet sportive, që të bashkohen në këtë ngjarje gjithëpërfshirëse, duke e kthyer Gollakun në një epiqendër të energjisë pozitive dhe inovacionit në natyrë./Katror.info
Përgatiti:
