Duoja e jashtëzakonshme Elina Duni dhe Rob Luft kanë sjellë një performancë të shkëlqyer të martën në mbrëmje kur edhe u hap Festivali “Mitrovica International Jazz Days,” në qendrën kulturore “Rexhep Mitrovica” në Mitrovicë.
Artistët me famë ndërkombëtare sollën këngë nga albumet e tyre “Lost Ships” (2020) dhe “A Time to Remember” (2023), në festivalin që edhe e shënon atë që njihet nga UNESCO si Jazz Appreciation Month.
Në sallën e mbushur plot, i pranishëm ishte edhe kryeministri në detyrë, Albin Kurti, bashke me disa nga ministrat në detyrë. Kurti e ka vlerësuar lart perfomancën e Dunit dhe Luft.
Mundesh me e lexu edhe…
“Dy zogj, një skenë, në Mitrovicë, me tingull shqip, që sa noton aq edhe fluturon!
Djathtas, pranë saj, një kitarist me botë të pasur nga jazz-i modern; majtas, pranë tij, një Zojë e zërit që përçon historinë e dhimbshme, ëndrrat që nuk treten dhe pikëllimin e bukur të trevave tona.
Elina Duni, Zana e skenës jazz shqiptare, me zërin e saj të butë e të fuqishëm, risjell malin, detin, mallin dhe shpirtin e baladave tona.
Në albumet e tyre “Lost Ships” (2020) dhe “A Time to Remember” (2023), ndërtuan një gjuhë të përbashkët që lidh thellësinë e këngës tradicionale me ndjeshmërinë e jazz-it evropian — dhe këtë gjuhë e sollën në Mitrovicë si pjesë e Jazz Appreciation Month nga UNESCO. Faleminderit Mitrovicës, Rona Nishliut, Elinës dhe Robit për këtë përjetim të rrallë muzikor,” ka shkruar ai në Facebook.
Drejtoresha e festivalit, Rona Nishli ka thënë se sot në Ditën Ndërkombëtare të Jazzit – 30 prill, në Prishtinë, sjellin një emër tjetër legjendar: Aziza Mustafa Zadeh (Azerbajxhan) – “një ikonë e jazzit botëror, me një stil të pakrahasueshëm që bashkon lindjen dhe perëndimin.”
E njohur në mbarë botën si Princesha e Jazz-it, Aziza është një artiste pioniere, muzika e së cilës kapërcen kufijtë. Stili i saj i jashtëzakonshëm përzien thellësinë shpirtërore të mugamit azerbajxhanas, lirinë e improvizimit të jazz-it dhe sofistikimin e muzikës klasike perëndimore, duke krijuar një tingull krejtësisht të veçantë dhe origjinal, thuhet në njoftimin e Festivalit.
Fituesja e çmimit prestigjioz Echo Music Prize, dhënë nga Deutsche Phono-Akademie, Aziza është simbol i fuqishëm i përsosmërisë artistike dhe një nga figurat femërore më të rëndësishme në skenën ndërkombëtare të jazz-it. Koncertet e saj janë të njohura për intensitet emocional, shkëlqim teknik dhe shprehje të thellë personale. Koncerti mbahet në amfiteatrin e ri së Universitettit të Prishtinës, duke filluar nga ora 20:30./Katror.info
Përgatiti:
