Një hartë e re që paraqet rajonet etnografike të Kosovës është publikuar së fundmi nga antropologia e njohur amerikane Janet Reineck, e cila prej dekadash i ka kushtuar një pjesë të madhe të jetës dhe punës së saj studimit të kulturës dhe traditave të Kosovës, shkruan Katror.info.
Kjo hartë është krijuar si pjesë e kursit “Etnografia e Kosovës” në RIT Kosovo, dhe përfaqëson një përpjekje unike për të vizualizuar identitetet kulturore rajonale në Kosovë.
Reineck e ndau nismën përmes një postimi në rrjetin social Facebook, ku shpjegoi se puna është zhvilluar në bashkëpunim me antropologët kosovarë Ukë Xhemaj dhe Arsim Canolli, bazuar në njohuritë e tyre të thella për terrenin kulturor të vendit. Ndërkohë, dizajnimi teknik i hartës është realizuar nga vëllai i saj që jeton në Kaliforni, pas disa muajve pune dhe konsultimesh me ekspertë vendorë.
Mundesh me e lexu edhe…
Sipas Reineck, kufijtë midis rajoneve në hartë nuk janë të ngurtë, por synojnë të japin një pasqyrë të përgjithshme të identitetit rajonal dhe të mënyrës se si komunitetet në Kosovë e përjetojnë përkatësinë e tyre kulturore.
Ajo thekson se ky është një projekt në zhvillim e sipër dhe se është e hapur për sugjerime nga njerëzit që jetojnë në këto rajone, duke e konsideruar hartën si një bazë për dialog dhe eksplorim të mëtejshëm.
“Shpresoj se harta do të përdoret gjerësisht nga njerëzit e interesuar për diversitetin dhe kompleksitetin e këtij vendi të bukur,” shkroi Reineck në postimin e saj.
Janet Reineck është autore e disa librave mbi traditat kulturore të Kosovës dhe ka doktoruar në antropologji me një tezë të fokusuar në këtë rajon. Ajo është e njohur për qasjen e saj të kujdesshme dhe të ndjeshme ndaj kulturës shqiptare dhe ka qenë një zë i rëndësishëm në promovimin dhe dokumentimin e trashëgimisë kulturore të Kosovës në arenën ndërkombëtare. /Katror.info
Përgatiti:
