Edicioni i radhës i festivalit agro-kulturor “Hardh Fest” do të mbahet më 5, 6 dhe 7 shtator në qytetin e Rahovecit. Organizatorët kanë njoftuar se hyrja për sivjet do të jetë falas, shkruan Katror.info.
“Festivali më i njohur në vend, Hardh Fest, në edicionin e radhës rikthehet “Për kokërr t’qefit” me 5, 6 dhe 7 shtator të vitit 2025″, thuhet në njoftimin e publikuar në rrjetin social Facebook.
“Hardh Fest 2025 premton një super edicion dhe do të vijë me shumë risi”, kanë shkruar organizatorët, duke theksuar se “një nga kryesoret është se festivali është pa bileta”.
Mundesh me e lexu edhe…
Festivali zhvillohet në Rahovec dhe synon të promovojë trashëgiminë kulturore e bujqësore të rajonit, përfshirë verërat, rrushin dhe produktet e tjera vendore, të kombinuara me muzikë live dhe aktivitete të tjera për vizitorët.
“Festivali është i veçantë, me aktivitete të vazhdueshme që kultivojnë dhe kujtojnë traditën dhe kulturën rahovecase për të gjithë vizitorët”, thuhet më tej në njoftim.
Organizatorët kanë theksuar se për listën e artistëve dhe aktivitetet e tjera, publiku do të informohet në kohë.
Festivali ka një ndikim të madh në forcimin e ekonomisë lokale të Rahovecit dhe Kosovës, duke kontribuar në promovimin e turizmit dhe produkteve vendore. /Katror.info
Përgatiti:
