Federata e Basketbollit e Kosovës (FBK) do të marrë pjesë në Kongresin e FIBA Botës që do të zhvillohet më 16-17 maj në Manama, Bahrejn, duke sjellë një rrëfim suksesi që tashmë ka tërhequr vëmendjen ndërkombëtare, shkruan Katror.info.
FBK është ftuar nga FIBA për të prezantuar zbatimin me sukses të Planit Strategjik 2021–2025, një proces ky i realizuar në bashkëpunim me programin FIBA Plus. Në këtë forum global, ku marrin pjesë të gjitha federatat anëtare të FIBA-s, Kosova do të përfaqësohet nga Kryetari i FBK-së, Arben Fetahu, dhe Sekretarja e Përgjithshme, Elvira Dushku.
Prezantimi do të mbahet më 17 maj nga z. Fetahu dhe do të përqendrohet në arritjet kryesore të katër viteve të fundit, përfshirë ngritjen e qeverisjes profesionale, fuqizimin e basketbollit të femrave, rritjen e pjesëmarrjes masive dhe zhvillimin e klubeve në të gjithë vendin.
Mundesh me e lexu edhe…
“Ftesa për të ndarë rrëfimin tonë në një platformë kaq prestigjioze është një dëshmi e progresit tonë të përbashkët dhe e besimit që është ndërtuar në punën tonë. Kjo është një arritje për të gjithë komunitetin e basketbollit në Kosovë,” deklaroi znj. Dushku, duke shtuar se synimi është të ndërtohet mbi këto suksese përmes Planit të ri Strategjik 2026–2030.
Kjo pjesëmarrje unike në Kongresin e FIBA Botës vlerësohet si një njohje e rëndësishme për FBK-në dhe një shenjë e reputacionit në rritje të basketbollit kosovar në arenën ndërkombëtare. Ajo shërben gjithashtu si frymëzim për federatat e tjera të vogla se me vizion të qartë dhe përkushtim, edhe sfidat më të mëdha mund të tejkalohen me sukses.
