Arabia Saudite ka miratuar zyrtarisht marrëveshjen për shërbime të transportit ajror me Republikën e Kosovës. Lajmi është konfirmuar nga Ambasada e Kosovës në Riad, e cila njoftoi se Kryeministri i Mbretërisë së Arabisë Saudite, njëherësh Princi i Kurorës, Mohammed bin Salman Al Saud, e ka aprovuar marrëveshjen në mbledhjen e fundit të qeverisë saudite, shkruan Katror.info.
Marrëveshja ndërmjet dy shteteve u nënshkrua më 29 tetor 2024 nga ministri tashmë në detyrë i Mjedisit, Planifikimit Hapësinor dhe Infrastrukturës, Liburn Aliu, dhe Ali Bin Mohammed Rajab, Zëvendëspresident Ekzekutiv për Transportin Ajror dhe Bashkëpunimin Ndërkombëtar nga Autoriteti i Përgjithshëm i Aviacionit Civil të Arabisë Saudite.
Sipas ministrit Aliu, kjo marrëveshje ka rëndësi të veçantë për zhvillimin e aviacionit civil të Kosovës. Ajo krijon bazën ligjore për vendosjen e linjave ajrore direkte ndërmjet dy vendeve dhe mundëson rritjen e bashkëpunimit në sektorin e transportit ajror. Në deklaratën e tij pas nënshkrimit të marrëveshjes, Aliu theksoi se kjo është një arritje që do të përmirësojë lidhjet ndërkombëtare të Kosovës dhe do të lehtësojë lëvizjen e qytetarëve dhe të mallrave.
Mundesh me e lexu edhe…
“Nënshkrimi i marrëveshjes shënon një moment të rëndësishëm në angazhimin e dy kombeve tona për përmirësimin e lidhjes, nxitjen e rritjes ekonomike dhe thellimin e shkëmbimit kulturor. Transporti ajror nuk është vetëm një mënyrë udhëtimi, por një urë që lidh njerëzit, bizneset dhe idetë përtej kufijve”, kishte deklaruar ministri Aliu.
Ai shtoi se Mbretëria e Arabisë Saudite ka qenë dhe mbetet një partner i rëndësishëm për Kosovën, dhe se kjo marrëveshje do të sjellë përfitime konkrete si për qytetarët, ashtu edhe për ekonominë dhe turizmin e të dy vendeve.
Marrëveshja e transportit ajror pritet të mundësojë fluturime direkte ndërmjet Kosovës dhe Arabisë Saudite, duke lehtësuar udhëtimet për qytetarët, bashkëpunimet afariste dhe shkëmbimet kulturore./Katror.info
