Kombëtarja e Kosovës në futboll do të vazhdojë sot pasdite me stërvitjen e radhës në kuadër të përgatitjeve për dy miqësoret e rëndësishme që do t’i zhvillojë në fillim të qershorit, shkruan Katror.info.
Dardanët do të përballen më 6 qershor me Armeninë në stadiumin “Fadil Vokrri” në Prishtinë, ndërsa më 9 qershor do të luajnë ndaj përfaqësueses së Komoreve, po në të njëjtin stadium. Këto ndeshje do të shërbejnë si teste vendimtare për përzgjedhësin Franco Foda në prag të nisjes së fushatës kualifikuese për Kampionatin Botëror 2026, ku Kosova ndodhet në një grup të fortë me Zvicrën, Suedinë dhe Slloveninë.
Ditën e djeshme, Kombëtarja zhvilloi stërvitjen e tretë nën drejtimin e trajnerit Foda. Seanca u karakterizua me intensitet të lartë dhe përkushtim maksimal nga ana e futbollistëve. Përzgjedhësi austriak kishte në dispozicion të gjithë lojtarët, përfshirë edhe ata që kishin munguar në seancat e mëparshme, duke vazhduar punën në konsolidimin e filozofisë së lojës që pritet të aplikohet në sfidat e ardhshme.
Stërvitja e radhës do të mbahet sot në orën 17:00 në stadiumin “Fadil Vokrri”, ku pritet të vazhdohet me përgatitjet intensive në kuadër të ndërtimit të një ekipi konkurrues për betejat që e presin Kosovën në muajt e ardhshëm./Katror.info
