Sot në mbrëmje, sheshi “Skënderbeu” në Prishtinë do të shndërrohet në një skenë magjike nën tingujt e muzikës klasike, ku Filarmonia e Kosovës do të ngjitet në skenë për një koncert gala së bashku me një nga yjet më të mëdha të operës botërore, sopranon shqiptare me famë ndërkombëtare, Ermonela Jaho.
Koncerti, i cili fillon në orën 20:30, organizohet nën drejtimin e maestro Jakopo Sipari di Pescasseroli dhe është rezultat i bashkëpunimit të Filarmonisë së Kosovës me Operën e Kosovës. Por përtej emocioneve artistike që priten sonte, në fokus të këtij aktiviteti kulturor ka qenë edhe një thirrje e fuqishme nga Jaho: Kosova ka nevojë për një Shtëpi të Operës.
Në një konferencë për media të mbajtur në Prishtinë, Jaho theksoi se talenti në Kosovë është i jashtëzakonshëm, por për të lulëzuar i duhen kushtet e duhura. Ajo bëri thirrje që të ndërtohet një teatër operistik që do t’i hapte dyert brezave të rinj të artistëve, duke e quajtur këtë një detyrim shpirtëror, moral dhe patriotik.
Mundesh me e lexu edhe…
“Një shtëpi operistike që do të kurorëzonte kulturën e Kosovës… që do t’i mblidhte të gjithë këta talente,” u shpreh Jaho me emocione. “Duhet të ngremë zërin së bashku që kjo shtëpi të bëhet realitet, sepse është e domosdoshme.”
Në të njëjtën konferencë, koncert mjeshtra Abigeila Voshtina theksoi se mungesa e një institucioni të tillë po i detyron të rinjtë të largohen jashtë vendit për të ndërtuar karrierat e tyre artistike. Ajo bëri thirrje për ndërgjegjësim qytetar e institucional:
“Mendoni për fëmijët tuaj, për të ardhmen e tyre. Nuk është e drejtë që ende në vitin 2025 artistët të marrin valixhet, ashtu siç kam bërë unë në vitin 1993.”
Kryesuesja e Bordit të Operës së Kosovës, Rreze Kryeziu, e quajti ardhjen e Jahos një moment historik për kulturën kosovare:
“Ermonela nuk është vetëm një emër i madh në skenën botërore, por një forcë që bashkon njerëzit përmes artit të saj.”
E lindur në Shqipëri dhe me karrierë ndërkombëtare që përfshin skenat më të njohura si Metropolitan Opera dhe Opera e Vjenës, Ermonela Jaho është shpallur “Këngëtarja më e mirë femër në Operë” nga Opera Awards 2024 dhe “Artistja e Vitit” nga International Classical Music Awards 2023.
Koncerti i sontëm premton një mbrëmje të jashtëzakonshme muzikore, por më shumë se kaq, është një thirrje për veprim, për ta kthyer ëndrrën e një shtëpie operistike në realitet./Katror.info
