Fakulteti i Arkitekturës në Universitetin e Prishtinës ka shpallur zyrtarisht lansimin e Konferencës së 4-të Ndërkombëtare IPAU 2025, e cila do të mbahet më 7 nëntor 2025 në Prishtinë. Këtë vit, konferenca zhvillohet nën temën: “Studimet Doktorale në Fakultetin e Arkitekturës, Avancimi i Kërkimit dhe Ekselencës Akademike”, përcjell Katror.info.
IPAU 2025 do të shërbejë si një platformë ndërkombëtare ku do të bashkohen akademikë të njohur nga universitete prestigjioze botërore, për të shkëmbyer përvoja dhe ide mbi zhvillimin e studimeve doktorale në arkitekturë dhe urbanizëm. Në fokus do të jetë dialogu kritik mbi sfidat, standardet dhe të ardhmen e arsimit të avancuar në këto fusha.
Në kuadër të planeve strategjike për themelimin e programit të doktoratës në Fakultetin e Arkitekturës të UP-së, kjo konferencë pritet të luajë rol kyç në ndërtimin e një baze të fortë akademike dhe kërkimore. Ajo synon të shërbejë si urë lidhëse ndërmjet përvojave vendore dhe atyre ndërkombëtare, duke kontribuar në ngritjen e cilësisë së arsimit të lartë në Kosovë.
Mundesh me e lexu edhe…
Pjesëmarrësit do të kenë mundësi të ndjekin ligjërata nga folës ndërkombëtarë, të marrin pjesë në sesione të moderuara dhe të angazhohen në diskutime për praktikat më të mira në zhvillimin e programeve doktorale, metodologjitë ndërdisiplinare, integritetin akademik dhe ndikimin e hulumtimit në shoqëri.
🔗 Për më shumë informacione rreth konferencës, vizitoni: https://fa.uni-pr.edu/page.aspx?id=1,156
/Katror.info
