Banka Qendrore e Republikës së Kosovës (BQK), në bashkëpunim me Bankën Botërore, ka organizuar sot një punëtori përgatitore që trajton aspektet teknike të nevojshme për anëtarësimin e Kosovës në Zonën e Pagesave në Euro (SEPA), shkruan Katror.info.
Ngjarja u zhvillua në kuadër të angazhimeve të Këshillit Kombëtar të Pagesave dhe u hap nga Guvernatori i BQK-së, z. Ahmet Ismaili dhe znj. Martha Licetti, Menaxhere e Praktikës për Financë, Konkurrueshmëri dhe Investime në Bankën Botërore. Të dy theksuan rëndësinë e këtij procesi për stabilitetin dhe modernizimin e sistemit financiar të Kosovës, si dhe mbështetjen e fuqishme të partnerëve ndërkombëtarë.
Punëtoria mblodhi përfaqësues të rëndësishëm nga institucione evropiane si Këshilli Evropian i Pagesave (EPC), Banka Qendrore Evropiane, përfaqësues të Bankës Botërore dhe institucioneve të tjera financiare ndërkombëtare, krahas përfaqësuesve të bankave dhe institucioneve financiare jobankare në vend.
Mundesh me e lexu edhe…
Diskutimet u përqendruan në kërkesat teknike, operacionale dhe ligjore për ndërlidhjen me SEPA, si dhe në nevojën për krijimin e një infrastrukture moderne dhe të sigurt për pagesa në përputhje me standardet evropiane.
Gjatë sesioneve të punës, pjesëmarrësit patën mundësi të shkëmbejnë përvoja dhe të diskutojnë praktikat më të mira të vendeve që tashmë janë pjesë e SEPA-s, me qëllim forcimin e kapaciteteve teknike dhe njerëzore për këtë proces të rëndësishëm për Kosovën.
BQK konfirmoi përkushtimin e saj për të avancuar më tej procesin e integrimit në SEPA, duke theksuar se ky është një hap strategjik drejt forcimit të sistemit financiar dhe lehtësimit të qasjes në tregjet evropiane për qytetarët dhe bizneset vendore./Katror.info
