Një kastor i ri u pa duke hyrë në Portugali nga Spanja – një ngjarje që një organizatë joqeveritare e quajti “një nga hapat më të rëndësishëm në rikthimin natyror të lumenjve portugezë”.
Sipas GNN, nuk ka kafshë tjetër përveç njeriut që mund të ndërtojë mjedisin e vet natyror në shkallë të tillë si kastori, dhe kjo veçori ka gëzuar shumë ekologët në Portugali.
I zhdukur në këtë vend të vogël iberik që nga shekulli i 15-të, ky brejtës i madh është rivendosur kohët e fundit në disa pjesë të Spanjës. Me kalimin e kohës, shenjat treguan se kastori po afrohej drejt Portugalisë, dhe kohët e fundit kamera ka konfirmuar praninë e tij, shkruan GoodNewsNetwork, përcjell Katror.info.
Mundesh me e lexu edhe…
Pedro Prata, drejtues i ekipit në Rewilding Portugal, thotë: “Kemi pritur për këtë moment disa vjet dhe tani jemi shumë të lumtur ta konfirmojmë rikthimin. Kastori është një aleat natyror në restaurimin e shëndetit të lumenjve dhe zonave të lagështa dhe ka rol thelbësor në ekosistemet e lumenjve tanë.”
Kastori ndërton diga që transformojnë peizazhin në parajsa të lagështa për peshq të vegjël, amfibe, insekte dhe zogj. Diga e ndërtuar ndryshon rrjedhën e ujit, krijon kanale për përmbytje dhe shton liqene e zonat e lagështa.
“Është një specie që ofron shërbime ekologjike që asnjë pajisje moderne nuk mund t’i zëvendësojë me të njëjtën efikasitet dhe shkallë, pa kosto apo burokraci,” thekson Prata. “Kastori përmirëson cilësinë e ujit, krijon strehë për speciet tjera dhe ndihmon në luftën kundër thatësirës dhe zjarreve.”
Portugalia përballet me thatësira dhe zjarre pyjore, ndërsa diga e kastorit ndihmon në mbajtjen e ujit në tokat e thata dhe krijon zona më të lagështa që veprojnë si barrierë natyrore për zjarret.
Kastori nuk jeton vetëm në pyje, por mund të transformojë edhe lumenjtë e shkretëtirave.
Rewilding Portugal, në një artikull për rikthimin e kastorit, tha se kanë paralajmëruar autoritetet ekologjike për efektet që ky kafshë sjell me vete, duke përfshirë edhe dëmet e mundshme, por që janë të tejkaluara nga përfitimet.
Franca, Gjermania, Suedia dhe Zvicra kanë përballuar përmbytje nga dëmtimi i digave të kastorit, ankesa nga fermerët për dëmtimin e fermave dhe prerjen e pemëve. Por, ato vende i menaxhojnë këto sfida për shkak të përfitimeve që sjell kjo specie.
Më parë, GNN raportoi se Rewilding Portugal ka rivendosur bisonët evropianë (bëjnë për tokën atë që kastori bën për ujërat) në luginën Côa – duke ndërtuar një peizazh të pasur dhe të qëndrueshëm me ekosisteme të vogla dhe të ndryshme./Katror.info
