Presidentja e Republikës së Kosovës, Vjosa Osmani, do t’i ftojë në ditët në vijim liderët e partive politike në takime, në përpjekje për të gjetur një zgjidhje për situatën politike të krijuar pas ngërçit në Kuvend, shkruan Katror.info.
Këshilltari për media i presidentes, Bekim Kupina, konfirmoi se Osmani pret nga partitë politike që të respektojnë vendimin e fundit të Gjykatës Kushtetuese dhe të përfundojnë seancën konstituive brenda afatit 30-ditor.
“Presidentja Osmani do t’i ftojë liderët e partive politike në takime në ditët në vijim. Presidentja pret që partitë e përfaqësuara në Kuvend ta zbatojnë Aktgjykimin e Gjykatës Kushtetuese dhe ta përfundojnë seancën konstituive brenda 30 ditësh. Nëse paraqitet nevoja, presidentja mbetet e gatshme t’i drejtohet Gjykatës Kushtetuese për sqarime shtesë,” deklaroi Kupina.
Mundesh me e lexu edhe…
Në lidhje me këtë iniciativë, kryetari i Partisë Demokratike të Kosovës (PDK), Memli Krasniqi, ka konfirmuar se do të marrë pjesë në takimin që pritet të mbahet nesër.
“Kam pranuar ftesën dhe besoj nesër është takimi, dhe unë do të jem aty. Qëndrimi ynë ka qenë gjithmonë i njëjtë. Prej dy-tre muajsh jemi duke u përpjekur të gjejmë zgjidhje dhe të ofrojmë kompromise për të dalë nga kjo situatë,” tha Krasniqi.
Ndërkohë, kryetari i Lidhjes Demokratike të Kosovës (LDK), Lumir Abdixhiku, tha se ende nuk ka marrë ftesë, por është i gatshëm të marrë pjesë sapo ajo t’i dërgohet.
“Jo ende nuk kam marrë ftesë, dhe shkojmë kurdo që marrim ftesë. Bën mirë që na mbledh presidentja dhe bën mirë edhe që të ketë qëndrim për këtë çështje,” u shpreh ai.
Ndryshe, Gjykata Kushtetuese ka publikuar aktgjykimin në rastin KO124/25, lidhur me kërkesën e paraqitur nga deputetja Time Kadrijaj dhe dhjetë deputetë të tjerë. Ata kundërshtonin vendimet e marra gjatë seancave konstituive në prill dhe maj 2025, përfshirë refuzimin për të formuar Komisionin për votim të fshehtë./Katror.info
