Presidentja e Republikës së Kosovës, Vjosa Osmani, ka pritur sot në takim Shefin e Zyrës së Bashkimit Evropian në Kosovë, Aivo Orav, me të cilin ka biseduar për zhvillimet më të fundit politike në vend dhe për rrjedhën e proceseve që ndërlidhen me integrimin evropian të Kosovës, shkruan Katror.info.
Në fokus të diskutimit ishte situata aktuale politike, me theks të veçantë në moskonstituimin e Kuvendit të Kosovës dhe pasojat që kjo situatë mund të ketë në funksionimin institucional dhe në raportet me Bashkimin Evropian.
Presidentja Osmani theksoi rëndësinë e veprimeve të shpejta për tejkalimin e bllokadës politike, në mënyrë që të mos pengohen proceset e rëndësishme për vendin. Ajo nënvizoi po ashtu se vonesat institucionale po ndikojnë negativisht në rrugën integruese të Kosovës dhe në trajtimin e aplikacionit për marrjen e statusit të vendit kandidat në BE.
Mundesh me e lexu edhe…
Në këtë kontekst, Presidentja kërkoi heqjen e plotë të masave të vendosura ndaj Kosovës nga ana e BE-së, të cilat i cilësoi si të padrejta dhe të dëmshme për qytetarët.
Nga ana e tij, ambasadori Orav rikonfirmoi përkushtimin e Bashkimit Evropian për të mbështetur rrugën evropiane të Kosovës dhe theksoi nevojën për stabilitet institucional si parakusht për avancimin e mëtejshëm në këtë drejtim./Katror.info
