Gjykata Kushtetuese e Kosovës ka pranuar disa kërkesa për interpretim kushtetues që lidhen me seancën konstituive të Kuvendit, e cila ende nuk ka përfunduar, edhe pse kanë kaluar rreth pesë muaj nga mbajtja e zgjedhjeve.
Lëndët janë dorëzuar nga Partia Demokratike e Kosovës (PDK), Lidhja Demokratike e Kosovës (LDK), si dhe së fundmi nga presidentja e vendit, Vjosa Osmani.
PDK dhe LDK i dorëzuan kërkesat e tyre në fillim të korrikut, ndërsa Osmani iu drejtua Gjykatës më 22 korrik, vetëm pak ditë para përfundimit të afatit 30 ditor për konstituimin e Kuvendit – afat i caktuar në aktgjykimin e qershorit nga vetë Gjykata Kushtetuese.
Mundesh me e lexu edhe…
Osmani ka dorëzuar një kërkesë në Gjykatën Kushtetuese për vendosjen e një mase të përkohshme për pezullimin e rrjedhjes së afatit prej 30 ditësh. Në një konferencë për media, presidentja ka bërë të ditur se kjo kërkesë ka për qëllim të parandalojë shkeljen e Kushtetutës nga ana e deputetëve në rast të konstituimit të Kuvendit pas skadimit të afatit kushtetues, apo krijimit të një qeverie në mënyrë të kundërligjshme.
E sot, në një përgjigje për Telegrafin nga Zyra për media e Gjykatës Kushtetuese kanë konfirmuar se janë duke i shqyrtuar kërkesat e PDK-së dhe LDK-së, të cilat kanë të bëjnë për vlerësimin e kushtetutshmërisë me votimin e Komisionit për Votim të Fshehtë si dhe është duke e proceduar kërkesën e Osmanit për interpretim se çfarë ndodh nëse Kuvendi nuk konstituohet brenda afatit kushtetues prej 30 ditësh, të përcaktuar nga vetë Gjykata në qershor.
“Janë duke u shqyrtuar kërkesat që lidhen me seancën konstituive të Kuvendit të Kosovës. Edhe kërkesa e dorëzuar nga presidentja e Republikës së Kosovës më 22 korrik 2025 është duke u proceduar nga Gjykata ”, thanë nga Zyra për media të Gjykatës Kushtetuese në një përgjigje për Telegrafin.
Ndryshe, më 3 korrik, PDK dorëzoi kërkesë zyrtare për vlerësimin e kushtetutshmërisë së zhvillimeve gjatë seancës konstituive të datës 29 qershor dhe vijimeve të saj më 1 dhe 3 korrik. Në kërkesë, PDK kundërshton veprimet e kryesuesit të seancës, Avni Dehari, për mënyrën e propozimit dhe votimit të anëtarëve të Komisionit për Votim të Fshehtë, si dhe për ndërprerjen e seancës pasi nuk u miratua ky komision.
Sipas PDK-së, këto veprime bien në kundërshtim me Kushtetutën dhe me vendimin e fundit të Gjykatës Kushtetuese që ka përcaktuar rrugën kushtetuese për konstituimin e Kuvendit.
Një ditë më vonë, më 4 korrik, edhe përfaqësuesit e LDK-së, deputetët Hykmete Bajrami dhe Armend Zemaj, si dhe anëtari i kryesisë së partisë, Shkëmb Manaj, dorëzuan kërkesën e tyre në Gjykatë.
Ata kontestojnë kushtetutshmërinë e votimit të Komisionit për Votim të Fshehtë dhe ndryshimin e rendit të ditës nga ana e kryesuesit, të cilin e konsiderojnë të paligjshëm.
Ndërkaq, presidentja Vjosa Osmani, më 22 korrik, iu drejtua Kushtetueses me një kërkesë për interpretim se çfarë ndodh nëse Kuvendi nuk konstituohet brenda afatit kushtetues prej 30 ditësh, të përcaktuar nga vetë Gjykata në qershor.
Në një konferencë për media, ajo tha se kërkesa ka për qëllim të qartësojë pasojat juridike të moskonstituimit të Kuvendit dhe të parandalojë përsëritjen e skenarëve të njëjtë.
Ajo kërkoi gjithashtu një masë të përkohshme për pezullimin e afatit 30-ditor, me qëllim që të shmangen veprimet që bien ndesh me Kushtetutën dhe të mundësohet formimi i institucioneve edhe pas afatit. /Telegrafi/Katror.info
