Për herë të parë, Kosova ka hartuar dhe miratuar një Program dhe Plan Strategjik të veprimit për Bujqësinë Digjitale për periudhën 2025–2028, një hap i rëndësishëm drejt modernizimit të sektorit bujqësor në vend, shkruan Katror.info.
Lajmin e ka bërë të ditur Ministri në detyrë i Bujqësisë, Faton Peci, përmes një postimi në rrjetet sociale, duke theksuar se ky dokument strategjik synon të nxisë e-qeverisjen, të mundësojë vendimmarrje të bazuar në të dhëna, dhe të krijojë një rrjet të integruar shërbimesh digjitale për fermerët dhe zonat rurale.
“Digjitalizimi në bujqësi po bëhet realitet! Me këtë program, do të fuqizojmë kapitalin njerëzor për transformim teknologjik dhe do të ndërtojmë një infrastrukturë të qëndrueshme për e-bujqësinë,” shkruan Peci.
Mundesh me e lexu edhe…
Programi i ri pritet të sjellë lehtësira të mëdha për komunitetin bujqësor, përmes ofrimit të mjeteve digjitale, trajnimeve për inovacion teknologjik dhe sistemeve të menaxhimit efikas të të dhënave.
Ky zhvillim shënon një etapë të re për bujqësinë kosovare, duke e vendosur atë në linjë me trendët evropianë të transformimit digjital në sektorin rural./Katror.info
