Në një sukses historik për mjekësinë moderne, një burrë 38-vjeçar nga Italia ka rifituar plotësisht shikimin pas një operacioni të parë në botë, që përfshinte një terapi gjenetike eksperimentale. Pacienti vuante nga sindroma Usher tipi 1b, një sëmundje e rrallë gjenetike që shkakton shurdhim të lindur dhe humbje progresive të shikimit, e cila çon në verbëri të plotë.
Sipas Euronews, operacioni u krye në korrik të vitit 2024 në kliniken e okulistikës të Universitetit të Kampanias “Luigi Vanvitelli” në jug të Italisë. Në atë kohë, pacienti shihte më pak se 10% të fushës vizuale.
Sot, një vit pas ndërhyrjes, mjekët konfirmojnë se ai ka rifituar pamjen si nga afër ashtu edhe nga larg – madje edhe në kushte me ndriçim të ulët.
Mundesh me e lexu edhe…
“Më parë gjithçka ishte e turbullt. Tani mund të dal vetëm natën, të njoh njerëzit, të lexoj titrat në televizor dhe të eci në magazinë pa u përplasur. Nuk është thjesht të shohësh më mirë – është të fillosh të jetosh”, u shpreh vetë pacienti.
Terapia revolucionare është zhvilluar nga Instituti Telethon i Gjenetikës dhe Mjekësisë (TIGEM) në Pozzuoli dhe funksionon duke futur dy vektorë viralë nën retinë, ku secili bart gjysmën e një gjeni që kodon për një proteinë jetike që u mungon pacientëve me Usher 1B.
“Operacioni bëhet nën anestezi të përgjithshme dhe rikuperimi është i shpejtë, pas dy javësh, pacienti filloi të dallojë më mirë, dhe pas një muaji orientoheshe edhe në errësirë. Sot, shikimi i tij është rikthyer plotësisht”, shpjegoi profesorja Francesca Simonelli, drejtoreshë e klinikës së okulistikës në Universitetin Vanvitelli.
Nga tetori 2024 deri në prill 2025, edhe shtatë pacientë të tjerë iu nënshtruan procedurës dhe asnjëri nuk pati efekte anësore serioze. Faza e dytë e testimeve do të përfshijë edhe shtatë pacientë të rinj, për të vlerësuar efikasitetin afatgjatë të trajtimit.
Nëse rezultatet konfirmohen, kjo terapi ka potencialin të hapë një epokë të re në mjekësinë gjenetike, duke u dhënë shpresë pacientëve me sëmundje të trashëguara të syve në mbarë botën./AP/Katror.info
