Mediat më të njohura ndërkombëtare i kanë kushtuar vëmendje të veçantë ceremonisë zyrtare ku presidentja e Kosovës, Vjosa Osmani, i dha shtetësinë kosovare këngëtares me famë botërore, Dua Lipa.
BBC dhe The Guardian, dy prej gazetave më prestigjioze britanike, e kanë cilësuar këtë moment si historik, duke vënë theksin në ndikimin kulturor dhe përfaqësimin ndërkombëtar që Lipa ka sjellë për vendin e saj të origjinës.
BBC, në raportim, përshkruan emocionet e Lipës, e cila në një deklaratë tha “ndjej se dy anët e mia janë bërë një. E dua këtë vend dhe kjo do të thotë shumë për mua dhe familjen time”.
Mundesh me e lexu edhe…
Ky medium kujton se Lipa, e lindur në Londër nga prindër kosovarë, ka jetuar në Prishtinë për disa vite pas shpalljes së pavarësisë së Kosovës, dhe se angazhimi i saj për vendin ka qenë konstant.
Po ashtu, mediumi prestigjioz britanik The Guardian shkroi se Lipa ishte “mirënjohëse” pas marrjes së shtetësisë, duke cituar postimin e saj në rrjetin social Instagram.
“Në natën e parë të festivalit, ajo interpretoi këngën ‘Era’ në shqip, së bashku me të atin – një performancë që u prit me entuziazëm të madh nga publiku”, shkroi The Guardian.
Gazeta përshkroi atmosferën e ngrohtë të ceremonisë, ku këngëtarja u mirëprit nga një kor fëmijësh që interpretuan këngën e saj të famshme “Levitating”.
Edhe gazeta britanike The Times ka raportuar për pranimin e shtetësisë së Kosovës nga Lipa.
Për Lipën raportuan gjithashtu edhe Roya News, një agjenci lajmesh dhe kanal televiziv i pavarur nga Jordania, The Irish News, një gazetë e përditshme nga Belfast, Irlanda e Veriut dhe Agenzia Nova, një agjenci lajmesh italiane me seli në Romë.
Dua Lipa ka performuar në natën e parë të Sunny Hill Festival, një ngjarje muzikore ndërkombëtare që e themeloi bashkë me babain e saj në vitin 2018.
Të enjten, Presidentja Osmani, e cila e priti Lipën në ceremoni, u shpreh se ishte një nder t’i dhuronte shtetësinë një prej figurave më ikonike kulturore në historinë e vendit.
“Dua dhe Kosova kanë qenë gjithmonë të pandashme. Ajo ka bartur historinë tonë me forcë, krenari dhe hijeshi”, u shpreh Osmani.
Këngëtarja tashmë mban tri shtetësi – britanike, shqiptare dhe kosovare – dhe është shpërblyer më parë me titullin Ambasadore Nderi e Kosovës në vitin 2022. Po atë vit, ajo mori edhe shtetësinë shqiptare për kontributin e saj në promovimin e vendit në arenën ndërkombëtare përmes muzikës.
Dua Lipa performoi në Prishtinë natën e parë të Sunny Hill Festival për afro dy orë e gjysmë./AP/Katror.info
