Bordi i Drejtorëve të Agjencisë Kosovare të Privatizimit (AKP) mbajti mbledhjen e rregullt, në të cilën u miratuan një seri vendimesh kyçe për avancimin e proceseve të privatizimit, menaxhimin efikas të aseteve dhe forcimin e qeverisjes institucionale.
“Bordi miratoi ndryshimet në Rregulloren për Shitje Direkte, me qëllim konsolidimin e dokumentacionit dhe standardizimin e shqyrtimit të kërkesave, në mënyrë që të rritet efikasiteti dhe transparenca e procesit. Po ashtu, u miratuan ndryshimet në Rregulloren për Administrim Direkt, për të forcuar menaxhimin, llogaridhënien dhe mbikëqyrjen ndaj ndërmarrjeve në administrim të drejtpërdrejtë nga AKP”, njofton Agjencia Kosovare e Privatizimit (AKP).
Një hap i rëndësishëm ishte miratimi i Rregullores së re për Ankand Publik, e cila mundëson shitjen e aseteve që nuk janë shitur pas katër procedurave të njëpasnjëshme të tenderimit publik. Rregullorja gjithashtu parasheh që, nëse këto asete nuk shiten as përmes ankandit, ato të mund t’u barten institucioneve publike për interes publik.
Mundesh me e lexu edhe…
Sa i përket shitjeve me tender publik të aseteve të ndërmarrjeve në likuidim (SHAL 74), Bordi miratoi 21 asete për shitje dhe refuzoi një ofertë.
Gjithashtu, u miratuan qiradhëniet e aseteve me tender publik (me qira mujore dhe sezonale/vjetore), si dhe qiradhëniet direkte për institucionet publike si Administrata Tatimore e Kosovës, Avokati i Popullit, Ministria e Kulturës, Rinisë dhe Sportit, Komuna e Prishtinës, Komuna e Novobërdës, si dhe për Organizatën Joqeveritare “Dardanët” – Klubi i Boksit.
Bordi miratoi listat përfundimtare të punëtorëve për tri ndërmarrje shoqërore: NSh “Proleter” në Prishtinë, NSh KB “Bashkimi-Jedinstvo” në Babush të serbëve (Ferizaj), dhe NSh KB “Gorazhdevc” në Pejë. Po ashtu, u aprovuan listat përfundimtare për nëntë ndërmarrje të tjera në Mitrovicë, Pejë, Gjakovë dhe Deçan, për të cilat shpërndarja do të bëhet në rast se do të ketë shitje të aseteve.
Gjithashtu, Bordi miratoi raportin e përkohshëm për shpërndarjen ndaj kreditorëve të IGK “Ballkani” dhe u njoftua për përfundimin e raportit final për KB “Banja”, i cili do t’i dërgohet Dhomës së Posaçme të Gjykatës Supreme të Kosovës (DHPGJSK) për mbylljen e ndërmarrjes.
Në përmbyllje, Bordi miratoi një buxhet shtesë për finalizimin e procedurave të likuidimit për disa ndërmarrje, përfshirë: NSh “Kombinati i Lëkurë-Këpucëve”, “Ereniku Industria”, “Ereniku Virxhinia”, “Boksitet e Kosovës”, “Hotel Junior” në Shtërpcë, “Milutin Nikolić – Shar Drvoexport” dhe “Zastava Ramiz Sadiku”./Katror.info
