Ekspertët e ushqyerjes kanë sqaruar një nga mitet më të njohura të fëmijërisë: gëlltitja e farave të shalqirit nuk shkakton rritjen e një shalqiri në bark dhe, madje, ato janë plotësisht të sigurta për konsum.
Sipas dietologes Samantha Cassetty dhe Celine Beitchman, Drejtoreshë e Nutricionit në Institutin e Edukimit Kulinar në Nju Jork, farat e shalqirit jo vetëm që nuk janë të dëmshme, por janë edhe të pasura me vlera ushqyese.
Vetëm 28 gramë fara (rreth një grusht i vogël) përmbajnë 7-8 gramë proteina, mbi 25% fibra dhe sasi të konsiderueshme të magnezit e hekurit, përcjell TAR.
Mundesh me e lexu edhe…
Magnezi luan një rol të rëndësishëm në mbi 300 funksione trupore, përfshirë rregullimin e ritmit të zemrës dhe reagimin ndaj stresit, ndërsa hekuri ndihmon në transportimin e oksigjenit në gjak dhe ruajtjen e energjisë. Beitchman shton se farat e shalqirit janë veçanërisht të dobishme për ata që ndjekin dieta bimore apo për gratë shtatzëna që kanë nevoja më të larta për hekur.
Megjithatë, ekspertët theksojnë se konsumi duhet të bëhet me masë. Përveç konsumit bashkë me frutin, farat mund të gjenden edhe të pjekura dhe të kriposura si snack, por rekomandohet kontrolli i përmbajtjes së sodiumit në produktet e paketuara.
Për ata që nuk janë mësuar me ushqime të pasura me fibra, është mirë që farat e shalqirit t’i shtojnë gradualisht në dietë për të shmangur shqetësimet e tretjes, pasi përmbajnë edhe sasi të larta yndyre.
Larg mitit të vjetër, farat e shalqirit jo vetëm që nuk dëmtojnë, por mund të jenë një shtesë e shëndetshme dhe ushqyese në regjimin ditor. /Katror.info
Përgatiti:
