Vera po përfundon, shkolla po ja nis, moti po ftofet, ama Monday Marks po vazhdon me plot propozime se ku me shku, çka me pa, ku me pi raki e me këndu, e ku me vallëzu. Super top lista!
Vera po na ikë prej durve si akullorja n’nxehtësinë e korrikut, po mos u mërzitni, shtatori po vjen me krejt arsenalin e eventeve që ju nxjerrin prej letargjisë verore.
Nëse doni teatër me peshë, Ferizaji prej 1 deri më 5 shtator e ka gati Festivalin e Teatrove me shfaqje e muzikë, e nëse doni raki, venë dhe qef, Rahoveci 5-7 shtator ju pret me Hardh Fest, rrush, verë, Tommy Cash e Aurela Gaçe. Në Prishtinë, Queer Festival më 6-7 shtator sjell ngjyra, diversitet dhe flea market, kurse Jazz Catz nis sezonin më 2 shtator me Ilir Bajrin e një jam session.
Për ata që duan me kcy, 7 shtatori sjell Street Party te Kafet e Vogla, nën qiellin e hapun. Ekspozita? Po, plot: Dion Zeqiri në Gjilan, Dastid Miluka në Tiranë, Made by Stern te Dudi’s Pub më 1 shtator.
Mundesh me e lexu edhe…
Për barkun e shprazt dhe shpirtin inkuizitiv, 4 shtatori sjell Balkan Fusion Pop-up në Tutto Vino me shije ballkanike e muzikë nga DJ Jungle, ndërsa 6 shtatori pop-up shopin te Lavjerr’s me art, dizajn e hip hop nga DJ Tesa. E nëse doni pak det e koncept unik, 2-4 shtator, MOMAFAD në Gjirin e Vlorës kthen katundet, qytete antike e ishuj në muze për një ditë.
Pra, vera mbaron, ama agjenda po veç po nxehet.
Me pa: Festivali i Teatrove Ferizaj / Teatri Adriana, Ferizaj
Nga 1 deri 5 shtator po fillon edicioni i 55-të i njërit nga festivalet më jetëgjata teatrore FTF – Festivali i Teatrove Ferizaj, ku do të ketë program të pasun të shfaqjeve nga teatrot simotra nga Prishtina, Prizreni, Gjakova, etj por edhe program muzikor me bende dhe performes si Xuxi, Don’l Listen to Your Neighbors, Dafina Bytyqi, etj. Shfaqjet kanë mu organizu në Teatrin Adriana și dhe Galerinë e qytetit.
Me pi, me hangër e me këndu: Hardh Fest, Rahovec
“Hardh Fest” osht ngjarje kryesore në Rahovec këtë fundvere, që feston trashëgiminë e pasun të kultivimit të rrushit dhe produktet e saj, tu e pozicionu eventin si një atraksion kryesor turistik në hartën e korrjeve të Kosovës. I nisun në vitin 2001 dhe tu fitu njohje kombëtare me kalimin e kohës, festivali ofron një platformë për fermerët e rrushit, pronarët e vneshtave, prodhusit e verës e rakisë, artistët, të rinjtë por edhe krejt Rahovecin për m’u angazhu aktivisht në jetën shoqërore dhe kulturore. Sivjet mbahet nga data 5 deri 7 shtator, dhe ka performus t’mirë si Tommy Cash, Armend Rexhepahiqi, Aurela Gaçe, etj, por edhe punëtori për adhurues e prodhues venash, degustim venash, dhe turli aktivitete tjera.
Me festu: Prishtina Queer Festival
Edicioni 2025 i Prishtina Queer Festival, sipas organizatorëve, reflekton “mbi qëndrueshmërinë si një akt radikal të refuzimit, mbijetesës dhe rigjenerimit.” Në Kosovë dhe më gjanë, shoqnia queer osht koxha e pasigurt: familje që të refuzojnë, qeveri që nuk janë fort përkrahëse dhe shoqnia që këmbëngulin me të drejtu konformitetit. Megjithatë, jeta queer vazhdon, qysh po shihet edhe nga festivali i sivjem, me temë frymëzume nga himni i David Bowie për lëvizjen dhe çlirimin. Festivali mbahet me 5, 6 dhe 7 shtator, ka performues, punëtori, por edhe një flea market te Kafet e Rakisë. Organizim divers që feston diversitetin.
Me dëgju: Prishtina Jazz Catz XV / Qendra Defy Them, Prishtinë
Shtatori po ja nis edhe sezonin 2025/26 të ediicionit Prishtina Jazz Catz me pianistin dhe kompozitorin Ilir Bajri, realisht, njani nga themeluesit e skenës së xhazit në Kosovë, i cili ka me prezentu albumin e tij më i fundit “Introspective”. Mbrëmja me 2 shtator pra hapet me Ilir Bajrin në piano dhe Visar Kuçin në gitarë dhe bas gitarë, si dhe Enes Beun në tupana. Pas koncertit, mbramja vazhdon si zakonisht me Jam Session, i dedikum promovimit të artistëve vendorë dhe ndërkombëtarë. Pjesa e parë e sesionit ka m’u fokusu në krijime origjinale, ndërsa pjesa pasuese shndërrohet një hapësirë për zbulimin dhe mbështetjen e talenteve të reja muzikore.
Me kcy: Street Party Prishtina / Kafet e Vogla, Prishtinë
Me 7 shtator e keni edhe një party n’zemër të qytetit, ku rruga Fehmi Agani, te Kafet e Vogla në Qafë mbyllet për muzikë dhe qef. Vera po përfundon kështu që kjo osht mundësi për eventet e fundit sivjet nën qiellin e hapun të kryeqytetit. Programi i plotë hala s’osht publiku, por mundeni me pritë bende, DJ dhe aktivitete përgjatë një dite në rrugen e frekuentume nga Prishtinalitë.
Me pa: Ekspozita personale e Dion Zeqiri / Galeria e Arteve, Gjilan
Ekspozita “Staring into the Distance” paraqet për herë të parë një përmbledhje të pikturave, fotografive, skulpturave dhe instalacionesh nga një dekadë krijimtarie e Dion Zeqirit. Tu përdorë materiale të gjalla dhe të vdekuna – nga bakteriet e ushqimit, e deri te fragmentet trupore – Zeqiri shndërron shqetësimin në bukuri. Sipas tekstit kuratorial, “në qendër të artit të Dion Zeqirit është paradoksi i jetës: dëshira për ta zgjatur dhe ruajtur, duke ditur se fundi është i pashmangshëm. Veprat e tij tregojnë se çdo veprim mund të jetë njëkohësisht shpëtim dhe rrezik, dhe se siguria shpesh tretet në pasiguri.” Ekspozita hapet me 4 shtator, në Galerinë e qytetit.
Me pa: Ekspozita personale e Dastid Miluka / Galeria e Artit të qytetit, Tiranë
Në zemër të Tiranës, vendlindjën e artistit Dastid Miluka, ekspozita e tij osht edhe një hartë personale e qytetit që ndërthur kujtimet e veta me transformimet urbane. Përmes kompozimeve poetike dhe figurave simbolike femërore, veprat e tij shpalosin një topografi emocionale ku peizazhi natyror dhe gjelbërimi ndërthuren me horizontin urban në zgjerim. Sipas tekstit kuratorial, “ekspozita është një himn vizual për kontrastet dhe harmonitë e Tiranës, duke e paraqitur si një hapësirë ku natyra dhe urbanizimi bashkëjetojnë dhe ku lidhjet mes njerëzve dhe vendit janë të padukshme, por të ndjeshme.” Po duket shumë e bukur, dhe nëse jeni në Tiranë, mos e harroni datën 3 shtator kur edhe hapet kjo ekspozitë në galerinë e qytetit.
Me pa: Ekspozitë e artit urban Made by Stern / Kampusi i UP, Prishtinë
“Eight’s Kingdom” sjell në Prishtinë botën magjike të Made by Stern, një artiste nga Zvicra e cila përmes pikturave të saj ndërton një univers plot ngjyra, energji dhe mesazhe që synojnë me prekë shpirtin urban. Ekspozita osht edhe një ftesë për me udhëtu nëpër frekuencat e artit të saj, ku çdo vepër mbart vlera të thella dhe sipas artistes “synon shërimin e njerëzimit. Përmes elementeve të saj vizuale dhe simbolikës së pasun, Made by Stern na fton me këqyr botën si një vend ma të lidhun, ma të ndjeshëm dhe ma kreativ. Ekspozita hapet sonte, më 1 shtator, në orën 19:30, te Dudi’s Pub, Kampusi i UP në Prishtinë.
Me shiju: Balkan Fusion Pop-up / Tutto Vino, Prishtinë
Qe një super pop-up, kësaj rradhe në Tutto Vino, mrapa Bibliotekës Kombëtare. Këtë të enjte, me 4 shtator, një bashkëpunim i gjatë në pritje po bohet realitet. Në Prishtinë po vjen Tasteful Consigliere, një legjendë urbane nga Shkupi dhe njohës i vërtetë i ushqimit dhe venës. Jo figurë publike, siç thotë vetë ai, por dikush që ka kalu nga kafahanet e qosheve të rrugëve ballkanike e deri te super restorantet me yje Michelin. Mbramja ju bien një menu të kurum posaçërisht, përzgjedhje venash të përshtatuna me kujdes dhe një set vinili hip-hop nga DJ Jungle (@asdrenzogai) për me kompletu atmosferën. Krejt kjo e bame me shije, thjeshtë, urbane.
Me mingle e m’u inspiru: Edicioni i parë i Pop-up shopit / Lavjerr’s, Prishtinë
Më 6 shtator, të shtunën, Prishtina osht vendi ku po hapet edhe një pop-up i veçantë, me pije, muzikë, koleksione dhe dyqane të përkohshme. Eventi mbledh artistë, krijues dhe brende vendore që sjellin punime origjinale, nga ilustrime e piktura, te veshje vintage, keramika artizanale dhe aksesorë të punuar me dorë. Mes pjesëmarrësve janë DreKras, Muse Shop, Box01, Onetastudio, Shtrigart, Arianit Lakna, Trafika64, MeDiell, Vayawave, PunKS, Blushydeeblush dhe Saint Dough, secili me botën e vet krijuese. Atmosfera ka m’u shoqni me tingujt e hip hop-it nga DJ Tesa, tu e bo këtë pasdite në një festë të artit, kulturës dhe komunitetit.
Me pa: Edicioni i Dytë i Museum of Modern Art for A Day / Galeria e Bregdetit, Vlorë
Nga 2 deri më 4 shtator 2025, në Gjirin e Vlorës do të mbahet edicioni i dytë i MOMAFAD (Museum of Modern Art for A Day), një projekt i artistit bashkëkohor grek Dionisis Christofilogiannis, i cili rikthen hapësina të ndryshme si muze për një ditë. Këtë vit, ai bashkëpunon me kuratorin shqiptar Elian Stefa, drejtor i Galeria e Bregdetit në Radhimë, për m’i aktivizu tre vende me histori të pasura e të ndërthurura: fshatin e vjetër Tragjas, qytetin antik të Orikumit dhe ishullin e braktisun të Sazanit. Çdo edicion sjell vepra të artistëve bashkëkohorë që ekspozohen për një ditë dhe ma vonë dokumentohen si pjesë e përhershme e historisë së vendit. MOMAFAD 2 synon me kriju një dialog mes artit dhe trashëgimisë kulturore, në një peizazh unik ku takohen Adriatiku dhe Joni. Super koncept!
Marrë nga Suzanne Podcast.
Përgatiti:
