Në Mamushë nis faza e dytë e realizimit të projektit të rrjetit të ujësjellësit, që financohet nga Ministria e Ekonomisë dhe implementohet nga KRU Gjakova. Ky projekt pritet të përfundojë brenda dy muajsh
Komuna e Mamushës në gjithë ekzistencën e saj nuk ka pasur ujësjellës. Banorët kanë hapur puse, për t’i plotësuar nevojat e tyre për ujë.
” Ujërat e puseve në Mamushë janë të ndotura, sepse përpara nuk e kemi ditë që është i ndotur uji, me këtë analiza që kemi bërë, kemi ardhur në përfundim se uji nuk është për pije më, prej asaj kohe, 90% e Mamushës për ujë të pijshëm, furnizohet me bartje, tha Arif Mazreku- banor i Mamushës.
Mundesh me e lexu edhe…
“Ne momentalisht këtu në Mamushë kemi ujë por ka shumë gëlqere, po prishen makinat, hidroforët, krejt. Jemi me bunar, tha Esat Mazreku,banor.
Një projekt i ujësjellësit ka filluar sot në Mamushë, ndërsa kryetari i komunës Abdyladi Krasniqi, beson që brenda dy muajve, banorët do të kenë ujë në çezmat e tyre.
“Mamushalitë qe 100 vjet janë tu e prit këtë ujin e pijes, po shpresojmë se një muaj e gjysmë, maksimumi dy muaj, në Mamushë, do të rrjedhë prej çezmave ujë i pijes kualitet, prej KRU Gjakova- Radoniqi”, tha Krasniqi.
Projektin e financon Ministria e Ekonomisë dhe Financave të Kosovës, ndërsa po e implementon KRU Gjakova.
“Projekti kap vlerën në 1.8 milion euro në dy faza, 1.2 milion prej këtyre mjeteve janë financim prej Qeverisë së Republikës së Kosovës, në kuadër të një liste të projekteve që kemi përkrahur anembanë vendit”, tha Getoar Mjeku zëvendës ministër në detyrë i Ekonomisë, shkruan RTK.
Ndërsa, Hasan Krasniqi, kryeshef i KRU “Gjakova”, tha se punëkryesi e ka afatin e 250 ditë punë për kryerjen e fazës së dytë të projekteve, mirëpo shpreson që, kjo kohë do të përgjysmohet, për arsye, siç tha ai, është nevojë shumë e madhe për furnizimin e kësaj zone me ujë.
Projekti i Ujësjellësit të Mamushës është në fazën e dytë të realizimit dhe përfshinë disa fshatra të kësaj ane./Katror.info
