Nga 24 deri më 26 tetor 2025, Fakulteti i Inxhinierisë Elektrike dhe Kompjuterike (FIEK) në Prishtinë do të jetë nikoqir i edicionit jubilar të Software Freedom Kosova (SFK), konferencës më të madhe për teknologjitë e hapura në Evropën Juglindore.
Këtë vit, SFK feston 17 vite impakt dhe sjell edicionin e 10-të me temën qendrore “AI, Machine Learning & Open Hardware”. Organizatorët presin mbi 500 pjesëmarrës fizikisht dhe mijëra të tjerë online, përfshirë zhvillues, studentë, studiues, profesionistë të teknologjisë, ndërmarrës dhe aktivistë të shoqërisë civile.
Programi do të përfshijë fjalime nga ekspertë ndërkombëtarë, punëtori praktike, hackathone dhe stenda prezantuese të kompanive dhe organizatave vendore e globale, si KDE, GNOME, OpenSUSE dhe Wikimedia Foundation.
Mundesh me e lexu edhe…
Në mesin e folësve kryesorë janë emra të njohur të komunitetit global të open source-it: David Cuartielles, bashkëthemelues dhe CTO i Arduino-s, Philippe Sadda nga Wikimedia Foundation dhe Jo Hinchliffe nga Raspberry Pi Official Magazine. Ata do të ndajnë përvojat dhe vizionet e tyre mbi ndikimin e inteligjencës artificiale dhe pajisjeve të hapura në të ardhmen e teknologjisë.
Konferenca organizohet nga FLOSSK (Free Libre Open Source Software Kosova), organizatë joqeveritare e themeluar në vitin 2009, e cila menaxhon gjithashtu Prishtina Hackerspace dhe ka qenë ndër pionierët në Kosovë për zhvillimin e teknologjisë dhe fuqizimin e të rinjve.
SFK 2025 shihet si një mundësi e veçantë për rrjetëzim, shkëmbim njohurish dhe bashkëpunim, duke treguar se si teknologjitë e hapura po formësojnë botën nga Internet of Things për shkolla deri te aplikimet e AI në qytete./Katror.info
