Kryetari i Komunës së Prishtinës, Përparim Rama, ka prezantuar sot linjat e reja të autobusëve që do të operojnë në kryeqytet, duke përfshirë edhe një transformim të madh të transportit publik.
“Ky është një ndryshim i madh për transportin publik në kryeqytet. Pas një pune trevjeçare, zgjerimi i rrjetit sjell linja në lagjet e Prishtinës ku më parë nuk ka pasur autobus. Kjo përfshin zona si Tasligjia, Velania, Bledi, Arbëria, Sofalia, lagjia Qëndresa, Veterniku dhe Zllatari”, tha Rama.
Ai shtoi se sistemi i ri do të lidhë edhe fshatrat përreth kryeqytetit, duke përfshirë Marecin, Viti e Marecit, Siqevën, Kolovicën, Dyzin, Zllashin, Banabanin, Nishecin, Llabjanin, Slivovën, Llajshefcin dhe Shkabajn.
Mundesh me e lexu edhe…
Sipas Ramës, tashmë janë mbi 30 linja të ndryshme dhe 172 autobusë, të cilët do të funksionojnë nën një sistem të unifikuar biletash, duke përfshirë bileta gjithëditore për qytetarët.
Ky projekt synon të përmirësojë qasjen dhe lidhshmërinë në transportin publik të Prishtinës dhe të rrisë mobilitetin për banorët e kryeqytetit dhe të zonave përreth./Katror.info
