Çmimi Nobel për Kimi iu dha Susumu Kitagawa, Richard Robson dhe Omar M Yaghi për punën e tyre mbi strukturat organike metalike.
Njoftimi u bë nga Akademia Mbretërore Suedeze e Shkencave në një konferencë për shtyp në Stokholm, Suedi.
Vitin e kaluar Demis Hassabis, John Jumper dhe David Baker fituan çmimin për punën e tyre mbi proteinat, të cilat janë blloqet ndërtuese të jetës.
Mundesh me e lexu edhe…
Puna e tre shkencëtarëve ka të bëjë me mënyrën se si molekulat mund të ndërtohen së bashku në struktura. Komiteti i Nobelit e quajti atë “arkitekturë molekulare”.
Ata punuan se si të ndërtojnë konstruksione me hapësira të mëdha midis molekulave, përmes të cilave mund të rrjedhin gazra dhe kimikate të tjera, raporton BBC, transmeton Klankosova.tv.
Këto quhen “struktura metalo-organike”. Ato mund të përdoren për të nxjerrë ujë nga ajri i shkretëtirës, për të kapur dioksidin e karbonit ose për të ruajtur gazra toksikë.
Profesori Kitagawa punon në Universitetin e Kiotos në Japoni, Profesori Richard Robson është në Universitetin e Melburnit, Australi, dhe Profesori Omar M. Yaghi është në Universitetin e Kalifornisë, SHBA.
Ky është çmimi i tretë shkencor që jepet këtë javë. Të martën, John Clarke, Michel H. Devoret dhe John M. Martinis fituan Çmimin Nobel në Fizikë për punën e tyre në mekanikën kuantike që hapi rrugën për kompjuterin kuantik.
Të hënën, puna e tre shkencëtarëve mbi mënyrën se si sistemi imunitar sulmon infeksionet armiqësore u fitoi atyre çmimin për mjekësi.
Një fitues, Dr. Fred Ramsdell, nuk e mori lajmin për 20 orë sepse ishte në një udhëtim ecjeje jashtë rrjetit elektrik./Klan Kosova/Katror.info
