Nëse i keni përfunduar pushimet verore dhe i jeni kthyer rutinës, koha është me i kthy sytë kah vendet turistike të Kosovës. E kohë super e mirë është ky fillim vjeshte, ku moti është me i freskët dhe ua bën vizitat edhe më të këndshme. Për t’ua bërë më të lehtë, në këtë video do t’ju paraqesim disa nga vendet më atraktive në Kosovë:
Shpella e Kusarit
Shpella e Kusarit sipas gjetjeve arkeologjike, ka qenë e banuar në kohën e e neolitit. Kjo shpellë gjendet 1km larg fshatit Kusar në Gjakovë dhe ndodhet në një terren malor të Maleve të Pashtrikut. Ju mund të udhëtoni me veturë deri tek destinacioni dhe pastaj të ecni 10 min deri në brendësi të saj ku edhe mund të shijoni pamjet magjepëse.
Mundesh me e lexu edhe…
Drini i Bardhë
Ujëvara e Drinit të Bardhë është bukuri natyrore dhe një nga burimet më të rëndësishme të Kosovës qe gjendet në fshatin Radavc të Pejës. Buron rrëzë bjeshkës së Rusolisë, nga gurra e shpellës së Radacit në lartësi mbidetare prej 586 m. Rruga për te Ujëvara e Drinit është e shtruar, dhe mund të afroheni me veturë deri te shtegu, ku pastaj vazhdohet me këmbë deri te ujëvara.
Kalaja e Prizrenit
Kalaja e Prizrenit është monumenti më i njohur i trashëgimisë kulturore dhe simboli i qytetit të Prizrenit. Kalaja e Prizrenit është përfaqësuesi më i veçantë i një vendbanimi prehistorik, antik, mesjetar, ndërsa gjatë periudhës osmane është shfrytëzuar më shumë si garnizon ushtarak. Rruga për në kala është e shtruar mirë duke ju marre jo më shume se 15-20 minuta. Nga kalaja do të shijoni pamje piktoreske të qytetit të Prizrenit.
Ujëvarat e Mirushës
Ujëvarat e Mirushes, në fshatin Rudë në komunën e Malishevës, janë ndër destinacionet më të bukura të Kosovës. Kjo zonë karakterizohet me një numër të madh të liqeneve me forma dhe madhësi të ndryshme duke përfshirë 16 liqene dhe 12 ujëvara. Ju mund të ngjiteni më lartë dhe të shihni të gjithë liqenet që ndodhen në këtë zonë dhe të kompletoni pamjet piktoreske të Ujëvarat e Mirushës.
Ulpiana
I themeluar në fillim të shekullit II nga perandori Trajan, Ulpiana – Qyteti Romak konsiderohet të jetë një nga vendet më të rëndësishme të trashëgimisë kulturore të Kosovës.
Qyteti antik i Ulpianës ka sipërfaqe prej 35,5 ha dhe ndodhet në Graçanicë, dhe është i rrethuar me mure të gjëra deri në 3m dhe me nga dy kulla gjysmërrethi. Është shumë afër kryeqytetit dhe mos e leni pa e vizitu këtë vendbanim që të kthen në kohë antike.
Shpella e Gadimes
Shpella e Gadimes ndodhet në Gadime të komunës së Lipjanit dhe është e njohur për dukuritë dhe pamjet interesante. Shpella përmban detaje mjaft interesante si kristale, rezonanca në stalaktit me të cilat mund të luani melodi, stalagmite, aragonite nëntokësore si dhe mure shumëngjyrëshe, ndërsa në brendësi të shpellës ndodhet gjithashtu edhe një liqen, i njohur si Liqeni i Fortunës në të cilin nëse i besoni bestytnive, mund të hedhni para për realizimin e dëshirave.
Gryka e Rugovës
Gryka e Rugovës, njohur ndryshe edhe si kanionët më të gjata dhe më të thella të Kosovës gjendet afër qytetit të Pejës në Bjeshkët e Nemuna dhe përbëhet nga disa ujëvara dhe burime uji siç është Uji i Zi dhe Kroi. Kjo pjesë gjithashtu përmban një urë harkore e cila lidh kanionin dhe tërheq mjaft shumë vizitorë të huaj nga e gjithë Kosova pasi është terren i përshtatshëm për ngjitje, piknik me familje, alpinizëm, bjeshkatari, etj.
Kalaja e Artanës
Kalaja e Artanës, ndryshe njohur edhe si Kalaja e Novobërdës ndodhet një mal të vogël ndërmjet Përlepnicës dhe Kricarekës në perëndim të Gjilanit. Në këtë kala, ruhen rrënojat e qytetit mesjetar të Novobërdës në të cilin kanë banuar mbi 50 mijë banorë. Kalaja e sipërme ka gjithsej 6 kulla, atë lindore dhe perëndimore të cilat kanë bazë drejtëkëndëshe ndërsa të tjerat kanë bazë katrore. Është lehtë për të shkuar dhe ecja nga vendi ku e parkoni veturën deri te kalaja nuk iu merr më shumë se 10 minuta.
Liqenati
Liqeni i Kuqishtes, ndryshe i njohur edhe si Liqenati ndodhet në Bjeshkët e Nemuna të cilat shtrihen në pjesën perëndimore të Kosovës. Liqenati ndodhet në një lartësi mbidetare 1.970m mbi nivelin e detit. Pavarësisht kësaj, ky liqen vizitohet nga turistë dhe alpinistë të shumtë të cilët ngjiten në majet e maleve.
Për të shkuar tek Liqenati, ju duhet të afroheni me veturë deri tek restauranti “Guri i Kuq” dhe pastaj të vazhdoni në këmbë duke ndjekur shtegun deri tek Liqenati.
Miq të dashur, këto janë vetëm disa nga vendet e bukura të Kosovës, që mund t’i vizitoni ndërsa në videot e radhës do të sjellim atraksione të tjera që mund të mos jenë të njohura, por që do t’ ju magjepsin si me bukuritë, ashtu edhe me historinë që bartin./Katror.info
Përgatiti:
