26 vjet më parë, Dr. Ferid Muradi pranoi Çmimin “Nobel” për Mjekësi, në një ceremoni të bukur, ku tregoi edhe për prejardhjen e tij shqiptare. Po ju sjellim sot historinë e jetës së tij të zbuluar në librin “Shqiptarët e Amerikës”, të autorit Vehbi Bajrami, botues i gazetës “Illyria”, në New York.
Kombi shqiptar përherë ka nxjerrë njerëz të shquar që ia kanë rritur krenarinë dhe e kanë radhitur përkrah kombeve të mëdhenj me njerëz të shquar. Njëri ndër shqiptarët me emër është pa dyshim edhe Ferid Muradi, fituesi i Çmimit Nobel në Mjekësi, më 1998. Ai përbën gjithashtu një nga figurat më të spikatura në radhët e shqiptaro – amerikanëve, shkencëtari që ka arritur të fitojë mirënjohjen më të madhe në botën akademike amerikane.
Ferid Muradi, i lindur më 4 Shtator 1936 në Whiting, Indiana, u rrit në një familje që vlerësonte arsimin dhe punën e palodhur. Që në moshën 12-vjeçare, ai ndjeu thirrjen për t’u bërë mjek, një pasion që e ndihmoi të përballonte vështirësitë e fëmijërisë dhe të dedikohej në kërkimet shkencore.
Mundesh me e lexu edhe…
Studimet dhe eksperiencat e tij të hershme në laborator i dhanë mundësinë të bëjë zbulime të rëndësishme, përfshirë efektet e oksidit nitrik dhe “Cyclo GMP”, që çuan në zhvillimin e Viagra-s. Ky zbulim, i cili ndihmon në trajtimin e impotencës dhe problemeve kardiovaskulare, ka pasur një ndikim të madh në industrinë farmaceutike, shkruan KultPlus.
Muradi u nderua me Çmimin Nobel në Mjekësi në vitin 1998 për kontributet e tij në këto kërkime. Ai poashtu drejtoi Departamentin e Biologjisë dhe Farmakologjisë Integruese në Universitetin e Texas-it në Houston.
Edhe pse kishte lindur në Amerikë dhe fliste pak shqip, Muradi mbeti i lidhur me rrënjët e tij shqiptare dhe ishte aktiv në komunitetin shqiptar në SHBA. Ai kishte vizituar Shqipërinë dhe trojet shqiptare dhe kishte shprehur shqetësim për gjendjen e ekonomisë dhe infrastrukturës atje, duke theksuar se ka ende shumë për të bërë për të përmirësuar situatën.
Ferid Muradi është shembull i përkushtimit dhe suksesit, duke treguar se me punë të palodhur dhe përkushtim mund të arrihet ndihmë e madhe për njerëzimin dhe të nderohet kombi./Katror.info
