Edhe këtë vit, klubi i pingpongut i kryeqytetit, PriPing ka ndërmarrë një aktivitet në luftën kundër kancerit të gjirit duke organizuar turneun tradicional PINK PONG.
Të veshur në bluza rozë, lojtarët dhe pjesëmarrësit tjerë, përçuan porosi se kontrolli i hershëm mund të shpëtojë jetë.
Ky event dinamik jo vetëm që tregoi aftësitë e lojtarëve të pingpongut, por gjithashtu theksoi rëndësinë e zbulimit të hershëm dhe ngritjes së vetëdijes rreth kancerit të gjirit.
Mundesh me e lexu edhe…
“Klubi i pingpongut tashmë e ka bërë tradicionale turnirin “PinkPong Breast Cancer Awareness Table Tennis Tournament, që është turnir na po thojna, por realisht është një event për ngritjen e vetëdijesimit të kancerit të gjirit. Përmes këtij aktiviteti po synojna që ndoshta me çu një mesazh te dikush që me shku me u kontrollu më herët, e pse jo nëse diagnostikohet më herët edhe me ia shpëtu jetën dikujna. Aktiviteti jonë primar është sporti i pingpongut, kështu që përmes sportit të pingpongut po dojna me përçua këtë mesazh,” tha Kastriot Orana, kryetar i Klubit PriPing.
Eventi përfshiu disa folës të njohur që ndanë mendimet e tyre mbi rëndësinë e zbulimit të hershëm. Një nga ta, është Nafije Latifi, drejtore në Qendrën Kosovare për Luftimin e Kancerit të Gjirit “Jeta Vita”.
“Kjo është një mënyrë që nga fëmijëria, që nga moshat më të hershme fëmijët të vetëdijësohen dhe të edukohen për kujdes shëndetësor dhe këtë mesazh ta përçojnë edhe në familjet e tyre që të kihet më shumë kujdes. Të bëhen vetë kontrolla, kontrolla të rregullta mjekësore, mamografi, ultrazë e tjerë,” tha ajo.
Drejtor i Onkologjise në Qendrën Klinike Universitare të Kosovës, njeherësh onkolog shumë i njohur, Ilir Kurteshi, theksoi përparimet në trajtimin dhe zbulimin e kancerit të gjirit në Kosovë.
“Ne kemi mbërri si shtet që këto sëmundje malinje në Kosovë t’i t’i zbulojmë ma herët, falë një sensibilizimi më të madh, sidomos muajin tetor, e që nuk mjafton veç muaji tetor, po duhet të bëhet më shumë secili muaj. Ne jemi shumë të interesum edhe si si jo vetëm si klinikë, po si shtet që të kemi diagnostikim shumë më të mirë të këtyre sëmundjeve. Pra, në vite dhe në vazhdim ministria e Shëndetësisë është duke kriju programet nacionale të skriningut, të cilat do t’i obligojnë femrat që të kenë një mamografi prej një moshe të caktuar një herë në vit dhe kjo do ta rrisë në masë të madhe zbulimin e hershëm sëmundjes,” tha ai.
Ai tha se falë rritjes së vetëdijes, kemi parë më shumë raste të diagnostikuara në faza më të hershme, të cilat përmirësojnë ndjeshëm rezultatet e trajtimit.
Kushtrim Mushica, Drejtori i Sportit në komunën e Prishtinës, thotë se ky turne është një pjesë e rëndësishme e ngritjes së vetëdijesimit.
“Po ashtu, gjithë e dimë se pjesëmarrja në sport parandalon sëmundjet dhe ne edhe e kemi si si politikë, si qëllim që të masovizojmë sportet në vendin tonë, në mënyrë që të kemi një shoqëri më të shëndoshë, Për fund, ëë i ftoj që të të bëni kontrolla të hershme, por gjithashtu të mirreni me sport, çfarëdo sporti qoftë ai,” tha Mushica.
Klubi PriPing, me mbështetje nga PriBank dhe sponsorë tjerë planifikon të vazhdojë këtë iniciativë, që synon rritjen e vetëdijesimit.
“Ne me kënaqësi si PriBank e kemi përkrahë këtë event, duke marrë parasysh që është event edhe sportiv, po gjithashtu e ka një qëllim shumë të mirë, për të cilin ne mezi presim realisht që me mujt sa më shumë e shpërnda realisht këtë vetëdije, në mënyrë që të kemi sa më shumë kontrolla të hershme, në mënyrë që të shpëtojmë jetë për të gjitha gratë dhe zonjat, të cilat munden me qenë të prekura prej kancerit të gjirit,” thotë Veranda Gashi Kryeziu nga PriBank.
Klubi PriPing në vazhdimësi ndërmerr iniviativa për ngritjen e vetëdijes për kauza të ndryshme që shkojnë në të mirë të komunitetit, duke kultivuar kështu përmes sportit, një kulturë shëndeti në Kosovë./Katror.info
Përgatiti:
