Komisionerja në Agjencinë për Informim dhe Privatësi, Krenare Sogojeva, ka thënë se nuk e sheh si problematikë që TikToku të përdoret në Kosovë përderisa kontrollohet mbi bazën e kërkesave ligjore.
Të mërkurën, në Komisionin për Çështje të Sigurisë dhe Mbrojtje u diskutua mundësia për ta mbyllur TikTokun, pasi deputetë të Kuvendit parashtruan para Sogojevës rreziqet e këtij rrjeti social. Megjithatë, ajo ka deklaruar se AIP-ja nuk është kompetente për mbylljen ose jo të TikTokut.
“Platformat janë krijuar për t’ju shërbyer njerëzve. Janë kufizimet që i përcakton Ligji i mbrojtjes së të dhënave që i përcakton ligji dhe nëse arrijmë t’i kontrollojmë mbi bazën e kërkesave ligjore, nuk e shoh problematikë përdorimin e TikTokut në Kosovë”, ka thënë ajo në Interaktiv të KTV-së.
Sogojeva ka shtuar se sfidë kryesore është që Kosova nuk e ka domeinin zyrtar dhe që kjo e bën më të vështirë kontrollin.
“Ka dy vjet që e kemi filluar kontaktin direkt me TikTokun. Sfida kryesore është që Kosova nuk e ka domeinin e saj zyrtar dhe ofruesit të shërbimeve të internetit në Kosovë janë të ndryshëm, por TikToku mundëson kyçjen jo vetëm nga këta ofrues brenda por edhe jashtë Kosovës, domethënë se del jashtë kompetencës sonë dhe nuk është lehtë e kontrollueshme. Ajo që kemi arritur ta bëjmë është përkthimi i politikave të privatësisë. TikToku dhe platformat tjera nuk janë problem vetëm në Kosovë, por janë problem global”, është shprehur ajo.
Në qershorin e këtij viti, Qeveria e Kosovës kishte ndaluar përdorimin dhe funksionimin e aplikacionit TikTok në institucionet shtetërore.
Ndërkohë, Sogojeva ka folur edhe për transparencën e institucioneve. Ka thënë se sivjet, deri në nëntor, në agjenci janë pranuar rreth 700 ankesa për mosofrim të qasjes në dokumente dhe katër gjoba ndaj institucioneve.
“Nuk kemi ngritje të transparencës, kemi rënie të lehtë varësisht prej institucioneve. Nëse shohim uebfaqet shohim se ka vetëm 50% të dokumenteve që duhet publikuar janë publike. Kjo ka ndikuar edhe periudha e digjitalizimit që po ndodhë. Është rritë numri i ankesave në anën tjetër. Mosofrimi i qasjes nga institucionet dhe mostransparenca e ka rritur edhe numrin e ankesave në agjenci”, ka potencuar Sogojeva. /Katror.info
Përgatiti:
