Administrata Tatimore e Kosovës (ATK) ka prezantuar një shërbim të ri elektronik që mundëson pajisjen me Certifikatën e Rezidencës Tatimore në mënyrë digjitale. Ky zhvillim u bë publik gjatë një takimi të organizuar nga ATK, ku morën pjesë Ministri i Financave, Punës dhe Transfereve, Hekuran Murati, Drejtori i Përgjithshëm i ATK-së, Ilir Murtezaj, përfaqësuesi i GIZ-it, Arben Salihu, dhe Kushtrim Canolli nga Zyra e Kryeministrit.
Ky shërbim përfaqëson një hap të madh drejt modernizimit të administratës publike, duke kursyer kohë dhe burime financiare për tatimpaguesit. Përmes platformës EDI, aplikimi për Certifikatën e Rezidencës Tatimore tani mund të bëhet pa nevojën e vizitave fizike në zyrat e ATK-së.
Ministri Murati e cilësoi këtë iniciativë si një shembull të qartë të përparimit teknologjik të administratës. “Ky është një hap konkret drejt digjitalizimit dhe përmirësimit të shërbimeve për qytetarët dhe bizneset. Prioriteti ynë është të ndërtojmë një administratë më të qasshme dhe më efikase,” tha ai.
Mundesh me e lexu edhe…
Drejtori Murtezaj nënvizoi rëndësinë e këtij shërbimi për tatimpaguesit dhe vuri theksin te mbështetja e vazhdueshme për projekte të ngjashme. “Automatizimi i Certifikatës së Rezidencës Tatimore është shërbimi i 58-të që ofron platforma jonë elektronike. Ky projekt nuk do të ishte i mundur pa mbështetjen e Zyrës së BE-së në Kosovë dhe GIZ-it,” tha Murtezaj.
Përfaqësuesi i GIZ-it, Arben Salihu, shtoi se ky projekt reflekton një partneritet të suksesshëm midis institucioneve vendore dhe ndërkombëtare. “Jemi krenarë të kontribuojmë në modernizimin e administratës publike dhe digjitalizimin e shërbimeve në Kosovë,” tha ai.
Projekti është pjesë e një sërë përpjekjesh për modernizimin e shërbimeve publike, me mbështetjen e Bashkimit Evropian dhe GIZ-it, duke dëshmuar përkushtimin për një administratë më efikase dhe transparente./Katror.info
Përgatiti:
