Muzikën eksperimentale, e kanë mbiquajtur njëfarë “Post Immigrant Pop”, krejt të pangjashëm.
Vargu mbart gjithmonë një dëshirë për t’iu kthyer atdheut, përmes bazës muzikore autentike (tradicionale), tërësisht shqiptare, veçse kësaj radhe me një ri-interpretim elektronik atipik.
Bëhet fjalë për projektin muzikor “Shkodra Elektronike”, i cili fitoi edicionin e 63-të të Festivalit të Këngës me interpretimin e “Zjerm”, shkruan Albanian Post.
Projekti përfshin kantautorin-producent Kolë Laca dhe kantautoren Beatriçe Gjergji.
Historia e tyre flet për dy emigrantë shqiptarë të rritur në Itali, shumë larg qytetit të tyre mëmë, Shkodrës.
“Zemra e projektit është ri-interpretimi i këngëve tradicionale shkodrane në një çelës elektronik bashkëkohor”, shkruhet në web-faqen e tyre zyrtare.
Ritregimi i etydit për “Zjerm”, nxjerr në pah shumë tematika aktuale si dhe ngjyra emocionale të shkrira me vokalizat në prapavijë.
“Imagjino një minutë…Pa ushtarë…Pa jetimë…Asnjë shishe në oqean…Naftës i vjen era jargavan…Lirinë e fjalës…T’a mëson shkolla”, janë disa vargje nga kënga e “Shkodrës Elektronike”.
Brengat e një rrëfimi të njerëzve “pa emër”, që i kërcejnë tokës së tyre, e cila i shndrit brenda kujtesës.
“Në zemrën time…Në zemër teme…Ky minutë do të vazhdojë…Njerëzit e mirë…Njerëzit pa emër…Kërcejnë valle në shpirt…Jarna ne ti toka ime…Ku kam lindë s’do të harroj…Jarna ne ti toka ime…Vazhdo më shndrit”, vijojnë pasazhet e tekstit që i theksohet gegënishtja tek-tuk.
Trilli i shtatë thikave shtjellon më pas tradhtinë dhe mashtrimin, që i ngulen atyre pa emër e të këputur, thjesht e vetëm se po kërkojnë flakën dhe dritën si thirrje e brendshme.
“Njerëzit pa emën e njerëzit e dlirtë…Njerëzit të këputur e bijnë…Si 7 thika që t’ngulen n’shpirt…Zjerm…Këtu flen deti, rana e hana…E yjet s’i shohim se yjet na i shkel kamba…Kur ecim n’jerm…Zjerm…Jena t’untë për flakë e dritë…E t’kërkojmë…N’kyt Terr që s’pranë tuej Shndritë“.
Projekti muzikor “Shkodra Elektronike” filloi në vitin 2019 dhe në këtë kohë dyshja e muzikantëve performuan në shumë evenimente të rëndësishme – italiane dhe shqiptare.
Në janar 2020 ata publikuan këngën e tyre të parë origjinale Ku E Gjeta Vedin, me të cilën morën pjesë në festivalin tradicional të muzikës në Shkodër, “Lule Bore”, ku fituan çmimin e kritikës.
Pa harruar tituj të tjerë po aq të njohur muzikorë si “Synin si qershia” apo “Turtulleshë“.
Synin si Qershia është një pjesë e kompozitorit legjendar Prenk Jakova, i cili u nda nga jeta në vitin 1969.
Versioni i “Shkodra Elektronike”, duke përzier sample (mostra – ed.) interpretimesh të vjetra me një tingull elektronik bashkëkohor, e sjell këngën në ditët e sotme me një shije ndërkombëtare.
Ata kompozuan edhe E Jemja Nuse (interpretuar nga Rezarta Smaja), fituese e çmimit të tretë në edicionin e 60-të të “Festivali i Kengës”.
Që nga debutimi në vitin 2004, Shqipëria ka marrë pjesë çdo vit në Eurovision Song Contest.
Rezultati më i mirë është një vend i pestë në vitin 2012, me këngën e Rona Nishliut – “Suus”.
Nga 20 herë që ka marrë pjesë Shqipëria, 11 herë është kualifikuar në finalen e madhe.
Kujtojmë që, finalja e madhe Eurovision Song Contest 2025 do të zhvillohet më 17 maj në St. Jakobshalle, Bazel./Katror.info
Përgatiti:
