Filmi nga Ibër Deari, “Everybody calls Redjo” (Krejt e thirrin Rexhën), do ta ketë premierën më 23 janar në Shkup. Pas këtij qyteti, rrëfimi kinematografik nisë rrugëtimin edhe në Kosovë e Shqipëri duke filluar nga data 30 janar.
Titulli “Everybody Calls Redjo” vjen nga një fenomen real në fshatin Sllupçan, ku njerëzit shpesh e thërrisnin një individ me emrin Redjo për t’i ndihmuar me punët në shtëpi apo në kopshte. Por e gjithë ngjarja është një shpërfaqje artistike e një fenomeni tashmë aktiv në Maqedoninë e Veriut, e përgjithësisht edhe në Ballkan: migrimin dhe pasojat që lë pas në vendet përkatëse, shkruan RTK.
Ibër Deari ka thënë se pritshmëria e tij është që publiku ta ndjejë historinë e filmit dhe të reflektojë mbi këtë temë.
Mundesh me e lexu edhe…
“Pres që kjo premierë të jetë një moment i veçantë, jo vetëm për mua si regjisor, por edhe për publikun që do ta ndjekë. Ky film reflekton shumë nga realiteti dhe përditshmëria jonë, dhe shpresoj që do të lërë një ndikim pozitiv, duke sjellë një perspektivë të re në industrinë tonë të kinematografisë. Për karrierën time, është një hap i madh përpara, një mundësi për të treguar historinë tonë dhe për të ndërtuar më shumë bashkëpunime në të ardhmen”, ka thënë ai.
Në anën tjetër aktori në rolin kryesor i cili e portretizon Rexhon, Afrim Muçaj ka thënë se e kanë pritur gjatë premierën, duke pasur parasysh që filmi ka kaluar në zgjatje kohore për shkak te pandemisë.
“Të them drejtën premiera e Rexhos është njëra prej datave qe e kam pritur me shume mall, por gjithashtu edhe me frikë, sepse pas gjithë atij mundi, dashurie e përpjekje për te sjellë një film fantastik qysh ne pretendojmë që është, erdhi momenti te dalim para publikut qe shpresoj dhe besoj qe do ju krijoj një ndjenjë fantastike dhe do të ngelet në koke si një nder historitë me te bukura artistike”, ka thënë Muçaj.
Në rolet e tjera luajnë aktorët: Adriana Matoshi , Ledion Mulaku, Adem Karaga, Mirsad Abazi, Bereda Reshit, Bujar Ahmeti, Labinot Raci, Adrian Aziri, Daniela Markaj, Sara Bajrami./Katror.info
Përgatiti:
